Екипирање и обединување на сите стоматолози, односно од сите бранши – специјалисти, општи, примарни, концесионери за да можеме да настапиме заеднички пред институциите што се одговорни за решавање на нашите проблеми, ќе бидат почетните приоритети, изјави за МИА, новоизбраниот претседател на Стоматолошката комора на Македонија, д-р Маријан Денковски.
Посочи дека имаат проблеми со законите за здравствена заштита, за здравствено осигурување и со Фондот за здравство, кои треба да се решаваат.
Но, покрај тоа што проблемите ги знаеме, имаме и решенија кои ќе ги предложиме, така што сметаме на подобар ефект отколку што беше досега. Се надеваме на нешто подобро, но сепак ќе треба малку време, додаде Денковски.
Денковски е избран за претседател на Стоматолошката комора на вчера одржаното Изборно собрание на кое за него гласале мнозинство од 47 присутни делегати.
