СДСМ испратил луѓе во Будимпешта на средба со поранешниот премиер Никола Груевски за да побараат помош од него за обезбедување одреден број пратеници од ВМРО-ДПМНЕ да гласаат за уставните промени за Бугарите да влезат во Уставот, во замена за амнестија за него и за некои негови луѓе – изјави Зоран Димитровски, поранешен новинар и уредник, а сега партиски функционер на Демократски сојуз, во настап во емисијата „Само вистина“ на Канал 5.
Димитровски рече дека за таа средба постојат фотографии и дека Груевски ја одбил таквата соработка.
– Груевски таквата соработка ја одбил. Без оглед какви се неговите моментни односи со лидерството на ВМРО-ДПМНЕ, тој одбил таква соработка со подземни игри да се прави во парламентот дво-третинско мнозинство. Ова можам да ви го кажам авторитетно и со информации кои ги имам од теренот. Постојат фотографии од средбата со Груевски на луѓе кои што се испратени од СДСМ. Јас не велам дека тие нема да се обидуваат и понатаму, да нудат пари на пратеници, на различни начини, но сметам дека овојпат имаме сосема различна ситуација. Или ќе гласа целото ВМРО-ДПМНЕ, или ниту еден нема да гласа – рече Димитровски.