По жестоките реакции и притисок од јавноста за случајот на медицинската сестра Јалдз Веапоска која при породување остана без три органи, а за тоа го обвини д-р Мухамед Асани, кој конечно вчера беше разрешен од директорската функција во струшката болница, тој се огласи преку Фејсбук. Асани вели дека совеста му е чиста.
– До денеска не се изјаснив, не затоа што немав што да коментирам или затоа што совеста не ми е чиста, како што и мислеа некои луѓе! Но сето тоа го направив во почит на одлуката на соодветните установи. Иако против мене имаше толку обвиненија со цел да ми го уништат авторитетот, сепак мислев дека првично својот став треба да го кажат соодветните одговорни институции. Но сфатив дека во дел од јавноста ова е погрешно сфатено – вели тој.
Според него, обвинувањата од некои индивидуи и портали кои не го познаваат ниту ја знаат неговата работа, со исклучок на сериозните медиуми, се всушност потикнати од противници и „антиалбански настроени индивидуи“.
– Независно од тоа што првично изгледа како обвинение против лекар, всушност е обвинение против мојата функција како директор на ОБ Струга, функција која јас заслужено и со многу одговорност ја извршувам повеќе од една година. Во врска со случајот се изнакажаа толку многу нешта што само имагинацијата на некој што по секој случај бара виновник може да ги измисли. Пациентката е примена во болница и направена е предоперативна подготовка по протокол. Беше втор царски рез кај пациентката, и нормално како по секој оперативен зафат, ризикот и можноста за компликации се зголемуваат во секој нареден зафат. На пациентката детално и е објаснета операцијата, ризиците, интра и постоперативните компликаци, истата свесно со своерачен потпис се согласила. Постоперативно пациентката беше под надзор секој ден од дежурните екипи (двајца лекари специјалисти гинеколози-акушери и 4 сестри акушерки), кои констатирале дека пациентката секој ден била стабилна. Петтиот постоперативен ден состојбата на пациентката се комплицира (интраабдоминална хеморагија), хеморагичен шок, животозагрозувачка состојба ако не се интервенира навреме и брзо. Итно влеговме во операциона сала екипа од двајца гинеколози, двајца хирурзи и двајца анестезиолози, секој работејќи на својата област. После една екстремно тешка и вонредна работа, која траеше цели 8 часа, успеавме да и го спасиме животот на пациентката. Сакам да нагласам дека гинекологот НЕ ВАДИ БУБРЕГ. Констатација од некои портали и индивидуи кои или тенденциозно го прават тоа или немаат поим што значи медицина – вели Асани.
Тој објаснува дека бубегот е изваден од страна на хирурзите кои во моментот имале индикација за тоа, зашто само на тој начин можело да го спречат крварењето кое потекнувало од таму (сето ова е се документирано).
– Работата во тек на ова операција е многу тешка, која се прави во специјализирани клиники, но со голема посветеност и упорност од целата екипа, заврши успешно. Потоа пациентката беше препратена во КАРИЛ за интензивен мониторинг и понатамошна евалуација. При прием на пациентката, лекарите и специјалистите од таа Клиника ја оценија нашата работа максимално професионално завршена. Нашата професионалност со тоа што ѝ го спасивме животот на пациентката се докажа и од комисијата формирана од Лекарска комора, под наредба од Министерството за здравство, која беше составена од пет специјалисти од соодветните области, гинекологија, хирургија, урологија и анестезиологија. По деталната анализа за горенаведениот случај, донесена е одлука: Не е констатирано ниту еден прекршок во тек на инервенцијата, не е најдено никаква лекарска грешка и секој чекор бил по медицинските протоколи. Јас лично мислам дека ниту еден лекар не сака да му се комплицира состојабата на неговите пациенти или во најлош случај да заврши со фатален исход. Но колку и да си посветен на работата и при вршење на истата, сепак може да настанат и компликации. Има и несовесни лекари но сите што ме познаваат мене, знаат дека не спаѓам во тие. Ова сум го докажал со мојата работа повеќе од 30 години, работејќи со голема професионалност и посветеност, каде над се бил животот на пациентите. Сум жртвувал часови од одмор, времето со моето семејство, моите деца, само и само за да бидам на служба на секој кој што имал потреба од мене.
На мојата 30 годишна кариера, одредени портали (новоотворени без никаков критериум) и индивидуи, ме обвинуваат без никаков основ за двата случаи како да сум направил криминал, пишува Асани на Фејсбук.
За случајот од Дебар, вели дека ја разбирам болката на семејството, но и дека во тој случај нема негова грешка.
– Жалам што пациентката се соочи со една таква компликација, но после интервенцијата целата состојба им беше објаснета на семејството и текот на операцијата. Целата медицинска документација им ја предадов на авторитетите и ќе го почитувам секој нивна одлука. Жал ми е што од несреќата на овие пациенти сакаат да придобиваат мои противници, како и различни портали кои само за повеќе лајкови , не земаат во предвид дека си играат со мојот углед и авторитет како лекар, но единствено што можам да кажам е дека: Мојата совест е многу мирна, зашто уште еднаш потенцирам дека цело време сум бил професионален и посветен во мојата работа – објаснува д-р Асани.