На светските девизни пазари курсот на американскиот долар минатата рабона седмица порасна во однос на другите најважни светски валути петта седмица со ред, што е најдолг период на неговиот раст во последните 15 месеци.
Индексот на доларот, кој го следи движењето на американската валута во однос на шесте најважни светски валути, достигна 103,43 поени на крајот на неделата, зајакнувајќи за 0,56 отсто во однос на претходната недела.
Истовремено, курсот на доларот во однос на европската валута зајакна за 0,72 отсто, па цената на еврото во петокот изнесуваше 1,0865 долари. Доларот поскапе и во однос на јапонскиот јен, за 0,3 отсто, на 145,37 јени.
Порастот на доларот петта седмица со ред е неговиот најдолг период во последните 15 месеци, поддржан од силниот раст на американската економија и покрај високите каматни стапки на американската централна банка Federal Reserve (Fed), како и подзабавеното закрепнување на Кина, што ја зголеми побарувачката за безбедно засолниште за капиталот, како што е американската валута.
Во четвртокот, записниците од последниот состанок на Fed покажаа дека повеќето гувернери сè уште гледаат „значителни нагорни ризици за инфлацијата“, што сугерира дека се склони да го продолжат циклусот на зголемување на основните каматни стапки.
Ова, пак, ги зголеми приносите на американските десетгодишни државни обврзници на највисоко ниво од октомври минатата година, од 4,328 отсто. Силните економски показатели, особено во малопродажбата, ги зајакнаа очекувањата дека каматните стапки може повторно да се зголемат.
„Пазарот сака Fed да престане да ги зголемува каматните стапки, но податоците едноставно не го поддржуваат тоа. Одбивноста кон ризик, повисоките приноси од обврзниците, се податоци што укажуваат на отпорноста на економијата кон рецесија… Сево ова совршено му помогна на доларот“, коментира за Rеuters Тони Сајкамор, аналитичар во IG.
Во однос на јенот, курсот на доларот минатата седмица достигна во еден момент највисокото ниво во последните девет месеци од 146,4 јени. Но, тогаш инвеститорите станаа многу претпазливи, бидејќи минатата есен падот на курсот на јенот во однос на доларот на 145 јени предизвика интервенција на монетарните власти, односно нивни големи набавки на јапонска валута во обид да го зајакнат нејзиниот девизен курс.
Курсот на доларот го достигна највисокото ниво во последните девет месеци во однос на кинеската валута. Имено, минатата недела еден од најголемите развивачи на кинескиот пазар на недвижнини „Evergrande“, побара заштита од доверителите во американскиот суд поради реструктуирање, поради проблеми со ликвидноста. Тоа ги загрижи пазарите поради продолжената криза во кинескиот сектор на недвижности, кој сочинува четвртина од економската активност во втората по големина економија во светот. И не само недвижностите, туку и банкарството, кое во голема мера е изложено на градежните компании.
Во такви услови, курсот на јуанот во четвртокот падна на најниско ниво во однос на доларот во последните девет месеци од 7,3098 јуани за долар. Кон тоа придонесе и намалувањето на каматните стапки од страна на кинеската централна банка на почетокот на минатата седмица, што го продлабочи јазот меѓу приносите што ги носат кинеските и американските инвестиции.
