Домаќинствата за 16,32 отсто ја намалиле потрошувачката на електрична енергија во скапа (висока) тарифа, откако се воведени блок тарифите, покажуваат анализите на Регулаторната комисија за енергетика и водни услуги на Македонија. Согласно податоците, 244 kWh изнесувала просечната потрошувачка на електрична енергија од 1 јули заклучно со 31 октомври во висока тарифа, што е за 16,32 отсто помалку во споредба со истиот период од минатата година кога просечната потрошувачка изнесувала 281 kWh.
„Реформата е успешна, блок тарифите даваат резултати и ја постигнуваат таргетираната цел за рационално користење на електрична енергија. Принципот кој троши повеќе да плаќа повеќе, а кој троши помалку, да плаќа помалку – има ефект и тоа го покажуваат анализите на просечната потрошувачка на струја во висока тарифа каде се регистрира за 16,32 отсто заштеда во потрошувачката од како ги воведовме блок тарифите од 1 јули до 31 октомври“ , изјави Марко Бислимоски, претседател на Регулаторната комисија.
РКЕ од 1 јули годинава воведе четири блок тарифи со цел за рационално користење на електричната енергија во услови на енергетска криза. Првиот блок е до 210 kWh, вториот е од 211-630 kWh, третиот е во опсег од 631-1050 kWh и четвртиот е над 1050 kWh.
