Според бројните српски медиуми, наскоро ќе има промена во стручниот штаб на Црвена ѕвезда, а клубот ќе го преземе искусниот 65-годишен црногорски кошаркарски стручњак Душко Ивановиќ.
Во својата играчка кариера Ивановиќ најуспешните денови ги мина играјќи за сплитска Југопластика, додека во долгогодишната тренерска кариера најдлабок впечаток остави во шпанската Басконија, каде работеше дури во три наврата. Беше тренер во овој клуб од 2000 до 2005 година и од 2008 до 2012 година, а таму ја извршуваше и последната тренерска работа од 2019 до минатата година.
Црвена ѕвезда под тренерското раководство на Влада Јовановиќ слабо ја започна новата сезона, па се наоѓа на последното место на табелата во Евролигата со скор 1-6. Неодамна доживеа неочекуван пораз и во регионалната АБА лига, кога Задар славеше во Белград.
Се наведува и дека Ивановиќ ќе го потпише договорот до крајот на сезоната 2023/24.
