Хуан Клаудио Д’Луна-Мендез и Хуан Франциско Д’Луна-Билбао се обвинети за „незаконско поседување оружје од страна на лице од странство“, соопшти судот.
Двајцата мажи се обвинети за смртта на 51 мигрант пронајдени во тешки услови во камионска приколка во Сан Антонио, во еден од најсмртоносните инциденти досега во трговијата со луѓе долж границата меѓу САД и Мексико.
Двајцата се обвинети за „незаконско поседување оружје од страна на лице од странство“, соопшти судот.
Кривична пријава е поднесена во понеделник, истиот ден кога мигрантите биле пронајдени во камионска приколка покрај железнички пруги.
Властите успеале да ги лоцираат мажите откако ја следеле адресата на која бил пријавен камионот и забележале дека Ford F-250 ја напуштил куќата.
Возачот е идентификуван како Д’Луна-Билбао и имал огнено оружје во автомобилот, се вели во соопштението.
Во истата куќа полицијата видела уште еден камион чиј возач, помлад маж, е идентификуван како Д’Луна-Мендез.
Двајцата се мексикански државјани кои илегално престојуваат во Соединетите држави.
Најмалку 22 лица, чии тела беа пронајдени во камионот, се мексикански државјани. Меѓу загинатите има седум Гватемалци и двајца од Хондурас. Мигрантите загинале во камионска приколка во Сан Антонио, Тексас, без вода и клима, каде температурата достигнала 39,4 степени Целзиусови.
Локалните власти реагираа на 27 јуни во приградските населби, по дојавата дека покрај железничките пруги е пронајден камион.
Полицијата била повикана на местото на настанот нешто пред 18 часот, кога работник во блиската зграда слушнал плач, изјави началникот на полицијата Бил Мекманус. Работник пронашол приколка со делумно отворена врата и внатре видел мртви луѓе.
„Сиромаштијата и очајот“ доведоа до смрт на мигранти, рече мексиканскиот претседател.
Андрес Мануел Лопез Обрадор ја обвини трговијата со луѓе и „недостигот на контрола“ на границата.
Белата куќа ја нарече смртта во камионот „ужасна и потресна“.
Сан Антонио, кој е на 250 километри од американско-мексиканската граница, е главната транзитна рута за шверцерите на луѓе.
Трговците со луѓе често користат камиони без документи за да превезуваат мигранти откако ќе ги сретнат во оддалечените области откако успеале да преминат во Соединетите држави.
Слични сценарија имало и порано во Сан Антонио, но не од вакви размери.
Во 2017 година, десет имигранти беа пронајдени мртви во слична тракторска приколка пред Волмарт, исто така на јужната страна на градот.
Имиграцијата е спорно политичко прашање во САД, каде во мај беа приведени рекордни 239.000 мигранти без документи кои влегле во земјата од Мексико. Многумина патуваат низ крајно ризични и небезбедни рути.
Американските службеници за спроведување на законот се на пат да надминат рекордни 1,73 милиони апсења на границата во 2021 година, при што голем број луѓе продолжуваат да минуваат од земјите од Централна Америка како Хондурас, Гватемала и Ел Салвадор.
