Во понеделник и вторник, првите луѓе на грчките политички партии, еден по еден, ќе бидат информирани од шефот на грчката дипломатија Никос Коѕијас за разговорите во Виена и текот на преговорите за името.
Меѓутоа, овојпат наместо претседателите на партиите да ја посетат зградата на министерството за надворешни работи, според грчките медиуми, Коѕијас брифинзите со политичките лидери ќе ги оддржува во партиските штабовите.
Како што јави дописничката на МИА од Атина, за денеска напладне официјално е закажана средба со генералниот секретар на Комунистичката партија на Грција, Димитрис Куцубас, со што и ќе започне циклусот средби. Веројатно е дека денеска Коѕијас ќе се сретне и со лидерот на партијата Река, додека пак во текот на утрешниот ден се предвидени разговори со лидерката на ПАСОК и Движење за промена, Фофи Генимата и претседателот на Сојуз на централисти Василис Левендис.
Најголемата опозициска партија Нова Демократија ќе остане последна за информирање, откако лидерот Кирјакос Мицотакис одби да го прими Коѕијас и побара да биде информиран лично од премиерот, шефот на грчката дипломатија ќе се сретне со одговорниот за надворешна политика во партијата.
„Коѕијас средбите нема да ги започне со претседателот на најголемата опозициска партија како што одредува протоколот затоа што Кирјакос Мицотакис ја одби поканата“, коментираше грчката државна телевизија ERT.
Информацијата за средбите на Никос Коѕијас со претседателите на партиите во Грција, ја објавија грчките медиуми уште пред почетокот на преговорите во Виена.
