Тоа што ни се случува денес во смисла на починати е одраз на тоа што ни се случува во изминатите денови. Ни се случува голема смртност, тука нема збор, ја надминуваме горната граница, вели доктор Нико Беќаровски во „Тема на денот“ на ТВ Сител.
Според него, овој сој почесто започнува како пролив и течна столица.
„И тука веднаш почнуваат со антибиотици, а нападнат е дигестивниот систем од вирусот. Наместо пробиотици, ние даваме антибиотици. Кога ќе се качи температурата на 37,1, сите веднаш даваат парацетамоли, аспирини, кетонали. Треба да оставиме малку организмот сам да се бори. Сепак, одиме со погрешна стратегија. Луѓето не се виновни, тие се исплашени, се зема се што треба и не треба. Мора да имаме јасни протоколи„, појаснува Беќаровски.
Оцени дека Македонија станува земја со сѐ повеќе коморбидитети, кои се поизразени од другите земји.
„Ако прошетавте летово по охридските плажи, ретко ќе видевте некој со нормална тежина, ако зборуваме за коморбидитет дебелина. Таа со себе носи дијабетис и хипертензија“, додава Беќаровски.
За овој четврт бран на коронавирусот, докторот вели дека ќе биде побурен, но помалку ќе трае.
