Едно лице загина, а уште четири други се повредени во четвртокот кога воз излета од шините во северна Норвешка, соопшти полицијата.
Камења паднале на возот што ги поврзува градовите Трондхајм на запад и Бодо на северот на земјата, по што излета од шините, изјави полицицскиот офицер Арилд Волдмо за норвешката радио и телевизија NRK.
Во несреќата едно лице загина, а четири лица се повредени, јави новинската агенција NTB, повикувајќи се на полициски претставник. Во моментот на несреќата во возот имало 55 лица и сите биле извлечени од вагонот, додава агенцијата.
Локомотивата и првиот вагон се превртеле на страна. На местото на несреќата се испратени три хеликоптера, а на снимката која ја објавија медиумите се гледаат и бројни возила на брза помош и пожарникари.
На шините може да се видат огромни камени блокови кои се откорнале од карпата, а се очекува да пристигнат геолозите за да го утврдат обемот на одронот, пред да го исчистат теренот и да го подигнат возот.
Свлечиштата не се невообичаени во Норвешка, особено во пролет кога снегот се топи.
