Едно лице загина во најтешкиот шумски пожар во Грција годинава, кој сè уште гори во предградие на Атина во вторникот, иако со намален интензитет благодарение на послабите ветрови и напорите на пожарникарите, соопштија властите.
Стотици пожарникари, поддржани од противпожарни возила и „водени бомби“ од авиони, се борат со пожарот што избувна во неделата во близина на селото Варнавас, 35 километри северно од Атина, и запали куќи, возила и делови од сува шума.
Разгоруван од силните ветрови, пожарот во понеделникот се префрли од шумско-ридското подрачје во предградијата, загушувајќи го градот со чад и пепел и предизвикувајќи паника во населбите кои со децении не виделе пожар толку блиску до центарот. Во понеделникот пожарот стигна до Врилиси, на околу 14 километри од центарот на Атина, каде едно лице беше пронајдено мртво, соопштија пожарникарите.
Причината за шумскиот пожар сѐ уште не е утврдена.
Ветровите се очекува повторно да зајакнат во вторник во текот на денот, а земјата ќе остане на ниво на висока опасност од пожари до четврток, со засилен ветер, а температурата се прогнозира до 40 Целзиусови степени.
„Севкупната слика изгледа подобра, но сѐ уште има многу фронтови во различни области“, рече претставник на противпожарната служба.
Пожарот остави зад себе напуштени домови, изгорени автомобили и јагленисани полиња. Локалниот весник Proto Thema објави дека изгореле 100 квадратни километри, вклучително и 100 куќи. Полицијата помогна да се евакуираат повеќе од 250 луѓе, а некои жители ја поминаа ноќта во засолништа.
Грција го активира европскиот механизам за цивилна заштита и очекува помош во авиони и пожарникари од Франција, Италија и Чешка. Шпанија и Турција, исто така, понудија помош.
Повеќе од 30 области беа принудени да се евакуираат, заедно со најмалку три болници, со прекин на електричната енергија во делови од поширокиот регион Атика. Патничките фериботи кои пловеа кон пристаништето Рафина, североисточно од главниот град, беа пренасочени.
