Претставниците на Европскиот парламент во средата на пленарна седница во Брисел го усвоија Пактот за миграција, пакет од десет законодавни акти за реформирање на европската политика за миграција и азил.
Овој законски пакет останува да го потврди Советот на ЕУ, кој се очекува на крајот на месецов, а ќе стапи на сила по објавувањето во Службен весник. Изгасаните прописи треба да се применат за две години. Земјите-членки, исто така, имаат две години да воведат промени во директивата за условите за прифаќање во нивното национално законодавство.
Целосната реформа на управувањето со миграцијата и азилот, со нови правила, треба да воведе повеќе ред во справувањето со овој проблем што ја мачи ЕУ од 2015 година. Реформата се заснова на предлозите на Комисијата од 2020 година, откако пропадна претходниот предлог објавен во екот на големата мигрантска криза во 2015 и 2016 година.
Изгласаниот пакет претставува прагматичен компромис, бидејќи никој не е целосно задоволен од него. За крајната десница тој не е доволно рестриктивен за влез на мигрантите и политиката за азил, а за мнозинството претставници на Зелените и крјаната левица пакетот е престрог и сметаат дека ги крши правата на мигрантите.
Една од целите на реформата е новите правила да бидат средство за одвраќање од патување лица кои не ги исполнуваат условите за меѓународна заштита. Европската унија сака таа да одлучува кој може да влезе, а не да одлучуваат шверцерите на луѓе.
Претставниците на најголемите политички групи во Европскиот парламент посочуваат дека ваквиот компромис е подобар од сегашните решенија кои воопшто не функционираат.
Пред гласањето, потпретседателот на Европската комисија, Маргаритис Схинас, повикувајќи ги претставниците да го поддржат пактот, рече дека „стремежот кон совршенство е најголемиот непријател на напредокот“.
Пактот за миграција и азил треба да им помогне на земјите на ЕУ кои се изложени на миграциски притисок, така што другите земји-членки ќе ги преселат барателите на азил или лицата кои уживаат меѓународна заштита на нивната национална територија или, доколку не сакаат, да дадат финансиски придонес или да обезбедат оперативна и техничка поддршка.
Уредбата за кризни ситуации и ситуации предизвикани од виша сила воспоставува механизам за одговор на наглото зголемување на бројот на пристигнувања. Обезбедува солидарност и поддршка за земјите-членки кои се соочуваат со исклучително голем прилив на државјани од трети земји. Новите правила ја опфаќаат и инструментализацијата на мигрантите. Тоа се случаи кога трети земји или непријателски актери користат мигранти за да ја дестабилизираат ЕУ.
Новите правила предвидуваат дека луѓето кои не ги исполнуваат условите за влез во ЕУ ќе бидат предмет на темелен процес на проверка, вклучувајќи идентификација, собирање биометриски податоци и здравствени и безбедносни проверки во рок од најмногу седум дена. Земјите-членки ќе треба да воспостават независни механизми за следење за да обезбедат почитување на основните права.
Заедничка постапка за признавање на меѓународна заштита
Во Европската унија е воспоставена заедничка процедура за признавање и повлекување на меѓународната заштита. Обработката на барањата за азил на границите на ЕУ во иднина ќе мора да биде побрзо, а роковите за неосновани или недозволиви барања ќе бидат пократки.
Податоците за луѓето кои нелегално пристигнуваат во ЕУ, вклучително и отпечатоци од прсти и слики од лица на лица на возраст од шест и повеќе години, ќе се чуваат во реформираната база на податоци на Eurodac (Евродак). Надлежните органи ќе можат да утврдат и дали лицето претставува безбедносна закана и дали било насилно или вооружено.
Парламентот, исто така, поддржа нови униформни стандарди за сите земји-членки поврзани со признавањето на статусот на бегалец или супсидијарна заштита и правата дадени на лицата подобни за заштита. Земјите-членки треба да ја проценат ситуацијата во земјата на потекло врз основа на информациите добиени од Агенцијата за азил на ЕУ, а статусот на бегалците редовно ќе се разгледува. Апликантите за заштита ќе мора да останат на територијата на земјата-членка одговорна за нивната апликација или на онаа во која заштита е одобрена.
Земјите-членки ќе мора да обезбедат еднакви стандарди за прифаќање на барателите на азил кога станува збор, на пример, за домување, образование и здравствена заштита. Регистрираните баратели на азил ќе можат да започнат со работа најдоцна шест месеци по поднесувањето на барањето. Ќе се регулираат условите за притвор и ограничување на слободата на движење со цел да се одвратат барателите на азил да се движат во рамките на Европската унија.
Во согласност со новата рамка за преселување и хуманитарен прием, земјите-членки доброволно ќе понудат прием на бегалци од трети земји признати од УНХЦР, кои би пристигнале во ЕУ на легален, организиран и безбеден начин.
