Турскиот претседател Реџеп Тајип Ердоган во телефонски разговор му рекол на американскиот претседател Џо Бајден дека САД имаат историска одговорност да постигнат траен прекин на огнот во Појасот Газа што е можно поскоро, соопшти кабинетот на турскиот претседател во четвртокот.
„Продлабочувањето и продолжувањето на израелските напади во Газа може да има негативни регионални и глобални последици, му рекол Ердоган на Бајден“, соопшти кабинет на турскиот претседател.
„Историска одговорност на САД е да обезбедат траен прекин на огнот во регионот што е можно поскоро“, рекол Ердоган.
Според неговиот кабинет, Ердоган рекол и дека повлекувањето на американската безусловна поддршка за Израел може да обезбеди брз прекин на огнот и дека барањата за таков потег се сѐ погласни во последните денови во светот и во самите САД.
Ердоган и Бајден разговарале и за процесот на пристапување на Шведска во НАТО и односите меѓу Турција и САД, вклучувајќи го и прашањето за продажбата на американските борбени авиони „F-16“ на Турција која е блокирнаа во американскиот Конгрес, соопшти кабинетот на турскиот претседател.
