Министрите за внатрешни работи на земјите членки на Европската унија изразија во средата вечерта на вонредниот состанок во Брисел солидарност со земјите на своите надворешни граници, кои се под притисок на мигрантите и ја истакнаа решителноста ефикасно да ги штитат границите.
„Советот изрази солидарност со Грција, Бугарија, Кипар и другите земји коишто би можеле да бидат погодени на сличен начин“, се вели во заедничката изјава којашто ја усвоија министрите на состанокот.
Се додава дека Европската унија тесно ќе соработува со земјите од западен Балкан во управувањето со мигрантските текови.
„Европската унија и нејзините земји членки остануваат решителни во заштитата на надворешните граници на Унијата. Илегалните минувања (на границите) нема да бидат толерирани. Во тој поглед, ЕУ и нејзините земји членки ќе ги преземат сите потребни мерки во согласнот со правото на ЕУ и меѓународното право“, се додава во изјавата.
