Германскиот канцелар Олаф Шолц изјави дека каматата акумулирана од руските средства кои се замрзнати во ЕУ ќе се користи за купување оружје за Украина.
Набргу откако Русија ја започна својата воена операција против Украина во февруари 2022 година, западните земји замрзнаа околу 300 милијарди долари од средствата на Руската централна банка. Од таа сума, клириншката куќа Euroclear со седиште во Брисел располага со околу 191 милијарди евра (205 милијарди американски долари), што има акумулирано скоро 4,4 милијарди евра во камата во изминатата година.
Говорејќи на заедничката прес-конференција со францускиот претседател Емануел Макрон и полскиот премиер Доналд Туск во петокот во Берлин, канцеларот Шолц рече: „Ќе ги искористиме неочекуваните профити од руските средства замрзнати во Европа за финансиски да го поддржиме купувањето оружје за Украина“.
Претседателката на Европската комисија Урсула фон дер Лајен минатиот месец предложи да се искористи каматата од замрзнатите руски средства за купување оружје за Украина. Сепак, Политико, повикувајќи се на анонимен функционер на ЕУ, во четвртокот објави дека Малта, Луксембург и Унгарија „искажале резерви“ за планот претходно оваа недела.
Москва постојано предупредува дека какви било активности преземени против нејзиниот имот би значело „кражба“. Истакна дека запленувањето на средствата или кој било сличен потег ќе го прекрши меѓународното право и ќе ги поткопа западните валути, глобалниот финансиски систем и светската економија.
