Европската комисија во понеделникот објави дека Европската унија е подготвена на прекинот на испораките на руски гас преку Украина по критиките од словачкиот премиер Роберт Фицо.
Портпаролката на Комисијата во понеделникот објави дека „европската гасна инфраструктура е доволно флексибилна за снабдување на централна и источна Европа со гас што не е од руско потекло преку алтернативни рути“.
„Ефектот од прекин на транзитот низ Украина врз европската безбедност е ограничен“, тврдеше таа.
Според Комисијата, европската гасна инфраструктура е зајакната со значителен увоз на течен природен гас (LNG), а безбедноста на снабдувањето е зајакната во последните години со мерки за енергетска ефикасност и проширување на обновливите извори на енергија. Меѓутоа, ЕК не наведува колкава ќе биде разликата во цената на енергенсот.
Украина, која изминатите децении водеше неколку ткн „гасни војни“ од кои последици во испораките и цените имаа земјите во ЕУ, на почетокот на следната година ќе го запре транзитот на руски гас. Постојниот договор за транзит истекува, а Киев однапред најави дека нема да се обновува.
Прекинот на снабдувањето претставува особени тешкотии за Словачка, како и за Унгарија, Австрија и Италија.
Во писмото до Комисијата, Фицо во неделата напиша дека „премолченото прифаќање на едностраната одлука на (украинскиот претседател Володимир) Зеленски“ за „блокирање на транзитот на руски гас е погрешно и ирационално“, и предупреди дека тоа ќе доведе до „зголемени тензии и реципрочни мерки“.
Според него, прекинот на транзитот повеќе ќе ѝ наштети на Унијата отколку на Русија.
Во петокот Фицо ѝ се закани на Украина дека неговата земја за возврат може да го прекине снабдувањето со електрична енергија, а Зеленски предупредувањето на Фицо го нареќе „наредба од Кремљ“.
Словачкиот премиер минатата седмица го посети рускиот претседател Владимир Путин во Москва, каде разговараше за алтернативните патишта по кој земјата и натаму ќе се снабдува со рускиот гас по прифатливи цени, поради што Европската унија и Украина остро го критикуваа.
