Кошаркарите на Партизан во еден од најнеизвесните дуели на вечерта беа поразени од екипата на Асвел со резултат 79:82 во 16. коло од Евролигата.
Асвел подобро влезе во натпреварот и беше јасно дека „црно-белите“ ќе имаат проблеми, уште повеќе што Партизан беше ослабен за неколку играчи кои досега беа стандардни во настапите. Поранешниот капитен на Партизан, Жофри Ловерњ и Тео Маледон им зададоа многу мака на домашните и францускиот претставник го почна меќот со серија 9:2. Партизан брзо се врати и дојде до првото водство, но кошаркарите од Лион брзо ја вратија предноста на своја страна која ја задржаа до крајот на првата делница.
И втората четвртина започна добро за Французите. Се разигра и Сако и го одведе Асвел на плус 8, но потоа белграѓани одговорија преку Двејн Вашингтон. Бекот на Партизан погаѓаше, а Асвел не најде начин во таа делница да го запре. Партизан брзо го сврте резултатот, а на полувремето успеа да замине со плус 6, кога Вашингтон погоди за „тројка“ со звукот на сирената.
„Црно-белите“ добро ја отворија третата четвртина. Одбраната на Партизан беше одлична и успеаја да ги запрат нападите на Асвел, а Вашингтон и Џонс продолжија таму каде што застанаа и ги доведоа „црно-белите“ на плус 9. Сепак, на половина од оваа делница Асвел со две „тројки“ успеа да намали на минус 3. Потоа натпреварот влезе во неизвесен период и Партизан одржуваше предност од еден посед, но Французите постојано им дишеа во врат на „црно-белите“. Асвел повторно со две „тројки“ во низа успеа да дојде до поен предност пред последните десет минути.
Асвел почна многу подобро во последните десет минути и многу брзо стигнаа до предност од 5 поени, а Партизан во тој период не можеше да погоди ништо. Де Коло ја презеде одговорноста и погаѓаше. Паризан продолжи со добрата игра во одбраната, но во нападот беше лош и без реализација и офанзивен скок. Грешеа и гостите, но на 12 секунди до крајот Де Коло успеа да постигне кош и да стави точка на натпреварот.
Кошаркарите на Реал Мадрид победија совладувајќи го водечкиот тим на гостувањето во Париз со 96:85.
Стрелците на Реал ги предводеше Факундо Кампацо со 19 поени, на кои додаде и шест асистенции, Марио Хезоња постигна 17 поени со погодени четири „тројки“ од девет обиди, а Џанан Муса постигна 12 поени. Парижаните не успеаја да го избегнат вториот последователен пораз во Евролигата, иако во своите редови го имаа многу расположените Маодо Ло со 30 поени и Надир Хифи кој постигна 21 кош.
Париз падна на учинок од 11-5 и му ја препушти лидерската позиција во поредокот на Монако, кој има идентичен скор 11-5 со повеќе постигнати коша. Водечкото дуо го следат три екипи – Жалгирис, Баерн и Фенербахче со учинок 10-6. Реал ја оствари седмата победа (7-9), но остана на 13. позиција.
Кошаркарите на Монако на домашен паркет го совладаа Баерн со убедливи 93:74 во дуелот меѓу вториот и третиот тим од Евролигата.
Георгиос Папајанис постигна 14 поени за победниците, а Мајк Џејмс додаде 13. Најдобар стрелец кај Баерн беше Карсен Едвардс со 17 поени, Данко Бранковиќ постигна 11 поени.
Така Монако оствари учинок од 11-5, а Баерн од третото привремено падна на четвртото место со 10-6.
РЕЗУЛТАТИ
Евролига – 16. коло
Монако – Баерн 93:74
Макаби Тел Авив – Басконија 85:95
Панатинаикос – ЕА Милан 103:74
Барселона – Фенербахче 90:63
Париз – Реал Мадрид 85:96
Алба – Жалгирис 66:86
Партизан – Асвел 79:82
Во среда:
Анадолу Ефес – Црвена ѕвезда (18.30 ч.)
Олимпијакос – Виртус Болоња (20.15)
ТАБЕЛА
1. Монако 16 11 5 1395:1288
2. Париз 16 11 5 1389:1338
3. Жалгирис 16 10 6 1236:1197
4. Баерн 16 10 6 1419:1404
5. Фенербахче 16 10 6 1246:1265
6. Олимпијакос 15 9 6 1273:1228
7. Панатинаикос 16 9 7 1363:1331
8. Барселона 16 9 7 1351:1325
9. ЕА Милано 16 9 7 1390:1389
10. Црвена звезда 15 8 7 1260:1216
11. Анадолу Ефес 15 8 7 1270:1244
12. Партизан 16 7 9 1303:1295
13. Реал Мадрид 16 7 9 1323:1317
14. Басконија 16 7 9 1260:1281
15. Асвел Вилурбан 16 7 9 1321:1365
16. Макаби Тел Авив 16 4 12 1353:1417
17. Виртус Болоња 15 3 12 1203:1267
18. Алба Берлин 16 3 13 1247:1445
