Европа речиси двојно го зголемила увозот на оружје од 2019 година, а повеќе од половина од пратките доаѓаат од САД, објави во понеделникот Стокхолмскиот меѓународен институт за мировни истражувања (SIPRI).
Во периодот од 2019 до 2023 година, европските земји увезле 94 отсто повеќе оружје отколку во претходните пет години, открива институтот. Податоците го покажуваат обемот на испораките, а не нивната вредност. Бидејќи обемот може значително да варира од година во година, институтот објавува извештаи за период од пет години.
Најголем увозник во споменатиот четиригодишен период во Европа била Украина, со удел од 23 отсто и четврто место во светското рангирање во периодот од 2019 до 2023 година, значи и далеку пред почетокот на руската инвазија во февруари 2022 година. Од почетокот на руската инвазија кон крајот на февруари 2022 година, таа добива воена помош во форма на оружје од најмалку 30 земји, според SIPRI.
Во периодот од пет години до крајот на 2023 година, најголем увозник на оружје во светот билаИндија, а потоа следат Саудиска Арабија и Катар.
Европа набавила нешто повеќе од половина од оружјето од САД, значително повеќе отколку во периодот од 2014 до 2018 година, кога уделот на САД во европскиот увоз изнесуваше 35 проценти.
„Одлуките на европските членки на НАТО за увоз од САД се обликувани од бројни фактори, вклучително и целта за одржување на трансатлантските односи, заедно со прашањата од потехничка, воена и трошковна природа“, објаснува директорот на SIPRI, Ден Смит.
„Доколку трансатлантските односи се променат во наредните години, може да се промени и политиката на европските држави за набавка на оружје“, додава Смит.
Американскиот извоз на оружје се зголемил за 17 отсто од 2019 до 2023 година, со учество од 42 отсто од глобалниот извоз. Во претходниот петгодишен период изнесуваше 34 отсто.
На второ место во рангирањето на светските извозници е Франција, чиј извоз скокнал за 47 отсто. Така, уделот на Франција во извозот скокнал на 11 отсто и се изедначил со оној на Русија, чиј извоз е преполовен во однос на периодот од 2014 до 2018 година.
Кина е на четврто место во светската ранг листа со удел во извозот од 5,8 отсто, а Германија е на петтото место со 5,6 отсто. Германскиот извоз е намален за 14 отсто во однос на претходниот петгодишен период.
Италија е рангирана на шестото место во светската ранг листа на извозници, Британија на седмото, Шпанија на осмото, Израел на деветтото, а Јужна Кореја на десеттото, според податоците на SIPRI.
