Европските берзи благо пораснаа во петокот во претпладнето, во претпазливото тргување додека инвеститорите ги очекуваат извештаите за инфлацијата во регионот, како и во САД.
Индексот STOXX 600 на водечките европски акции порасна за 0,1 отсто. Истовремено, лондонскиот FTSE индекс зајакна за 0,34 отсто, на 8.407 поени, додека франкфуртски DAX се зголеми за 0,03 отсто, на 18.906 поени, а париски CAC за 0,35 отсто, на 7.666 поени.
Цените на акциите пораснаа и на азиските берзи. Индексот MSCI на азиско-пацифичките акции, без јапонските, порасна за 0,6 отсто, така што е на пат да добие околу 2 отсто овој месец. Претпладнево на токиската берза индексот Nikkei порасна за 0,7 отсто, додека цените на акциите во Австралија, Јужна Кореја, Шангај и Хонгконг пораснаа меѓу 0,5 и 1,3 отсто.
Инвеститорите беа охрабрени од стабилноста на Волстрит и покрај вчерашниот остар пад на цената на акцијата на производителот на чипови „Nvidia“. Тоа можеше да изврши притисок врз целиот технолошки сектор, но не се случи такво нешто. Напротив, индексот Dow Jones зајакна за 0,59 отсто и достигна ново рекордно ниво, додека S&P 500 ослабе за само 0,01 отсто, а индексот Nasdaq за 0,23 отсто.
Пазарите се поддржани и од податоците за посилниот од очекуваниот раст на американската економија, најголемиот извозен пазар на азиските компании. Вчера беше објавена втора проценка, која покажа дека бруто домашниот производ (БДП) пораснал за 3 отсто во вториот квартал, а не за 2,8 отсто, како што покажа првата проценка. Ова го засили верувањето на инвеститорите дека најголемата светска економија ќе избегне рецесија, и покрај повисоките каматни стапки.
Пазарите се поддржани и од верувањето на инвеститорите дека американската централна банка ќе ги намали каматните стапки во септември.Во петок ќе бидат објавени новите податоци за инфлацијата во САД, што може да влијае на очекувањата за каматните стапки. На пазарот преовладува мислењето дека Fed ќе ги намали каматните стапки за 0,25 процентни поени во септември, но некои очекуваат поостро намалување од 0,50 процентни поени.
