Цените на акциите пораснаа на повеќето европски берзи во вторникот наутро, како и претходниот ден на Волстрит, при што индексите ги вратија вчерашните загуби. Индексот STOXX 600 на водечките европски акции претпладнето часот порасна за 0,5 отсто, враќајќи ги вчерашните загуби. Лондонскиот FTSE индекс ослабе за 0,04 отсто, на 8.220 поени, додека франкфуртски DAX порасна за 0,57 отсто, на 20.247 поени, а париски CAC за 0,95 отсто, на 7.480 поени.
Цените на акциите пораснаа и на азиските берзи. Азиско-пацифичкиот берзански индекс MSCI претпладнево порасна за 0,6 отсто, враќајќи ги вчерашните загуби. Утрово јапонскиот индекс Nikkei падна за 1,8 отсто, додека цените на акциите во Јужна Кореја, Австралија, Хонгконг и Шангај пораснаа меѓу 0,3 и 2,5 отсто. Силниот раст на кинеските берзи е благодарение на надежите на инвеститорите за нови стимулативни мерки, со оглед на побавниот од очекуваниот раст на втората по големина економија во светот.
На пазарите позитивно влијаеше вчерашниот раст на цените на акциите на Волстрит, кога Dow Jones порасна за 0,86 отсто, а S&P 500 индексот за 0,16 отсто. Така, S&P 500 се оддалечи од најниското ниво во последните два месеци, на кое се лизна минатата недела под притисок на подобрите од очекуваните податоци за вработеноста во САД.
И покрај растот на индексите Dow Jones и S&P 500, тргувањето на најголемата светска берза беше претпазливо бидејќи инвеститорите стравуваат од пораст на инфлацијата, што ќе ја поттикне американската централна банка да го забави или целосно да го запре темпото на намалување на каматните стапки.
„Инвеститорите се плашат дека инфлацијата ќе расте. „Не сум сигурен дека тоа ќе се случи, но има загриженост, па верувам дека ќе помине долго време пред Fed повторно да ги намали каматните стапки“, вели Тим Гриски, стратег во „Ingalls & Snyder“.
