Цените на акциите паднаа на европските берзи во вторникoт во претпладневното тргување бидејќи инвеститорите се загрижени од најавата на новоизбраниот американски претседател Доналд Трамп дека ќе ги зголеми царините за увоз од неколку земји.
Индексот STOXX 600 на водечките европски акции беше во минус од 0,6 отсто. Истовремено, лондонскиот FTSE индекс ослабе за 0,46 отсто, на 8.250 поени, додека франкфуртски DAX се лизна за 0,68 отсто, на 19.275 поени, а париски CAC 0,81 отсто, на 7.200 поени.
Цените на акциите паднаа и на азиските берзи. Индексот MSCI на азиско-пацифичките акции беше намален за 0,2 отсто. Во исто време, индексот Nikkei се лизна за 1,4 отсто на токиската берза, додека цените на акциите во Шангај, Хонгконг, Јужна Кореја и Австралија паднаа меѓу 0,1 и 0,6 отсто.
Доналд Трамп ноќта кон вторникот најави дека на првиот ден во Белата куќа ќе ги зголеми царините за кинескиот увоз за 10 отсто, а на мексиканскиот и канадскиот за 25 отсто.
Ова ги натера инвеститорите да бидат претпазливи, а повеќето азиски берзански индекси утрово се во минус. Меѓутоа, кинеските берзи стагнираат бидејќи зголемувањето на царините, велат аналитичарите, било очекувано.
„За време на претседателската кампања, Трамп најави воведување тарифи од 60 отсто за кинески производи, така што неговата нова порака за царини од 10 отсто е всушност позитивна“, објаснува Јанг Тингву, директор во „Tongheng Investment“.
Покрај тоа, инвеститорите се надеваат на нови стимулативни мерки од кинеските власти, со оглед на заканите на Трамп за царини.
„Кина веќе има искуство со трговската војна од првиот мандат на Трамп, така што сигурно веќе има планови како да се справи со тоа. Протекционистичката политика на Трамп може да ја охрабри Кина да го забрза процесот на постигнување самодоверба и замена на увозот“, вели Симон Ју, директор во „Panyao Asset Management“.
