Цените на акциите пораснаа на европските берзи во вторникoт претпладнето, најмногу во технолошкиот сектор, при што британскиот индекс FTSE достигна ново рекордно ниво.
Индексот STOXX 600 на водечките европски акции во првиот дневен пресек на тргувањето порасна за 0,6 отсто, зајакнувајќи втор ден по ред. Истовремено, лондонскиот FTSE индекс зајакна за 0,59 отсто, на 8.070 поени, додека франкфуртски DAX порасна за 0,86 отсто, на 18.013 поени, а париски CAC за 0,40 отсто, на 8.070 поени.
Најмногу претпладнево поскапеа цените на акциите во технолошкиот сектор, речиси 2 отсто. Германскиот SAP го предводеше патот со раст на цената од 4,6 отсто, откако софтверскиот гигант објави подобри квартални резултати од очекуваните.
Цените на акциите пораснаа и на повеќето азиски берзи. Индексот MSCI на азиско-пацифичките акции, без јапонските, во истиот пресек од тргувањето како и во Европа порасна за 0,4 отсто, добивајќи сила втор ден по ред. Истовремено, на токиската берза индексот Nikkei зајакна за 0,3 отсто, додека цените на акциите во Австралија и Хонгконг пораснаа меѓу 0,4 и 1,7 отсто. Во Јужна Кореја и Шангај, пак, паднаа меѓу 0,2 и 0,7 отсто.
Растот на азиските берзи втор ден по ред е благодарение на смирувањето на тензиите на Блискиот исток, меѓу Израел и Иран. Покрај тоа, инвеститорите беа охрабрени од вчерашниот пораст на Волстрит по шестдневниот пад. Dow Jones зајакна за 0,67 отсто, додека S&P 500 порасна за 0,87 отсто, а Nasdaq индексот за 1,11 отсто.
„Мислам дека тоа е стандардно купување откако цените на акциите паднаа за 5 проценти. Инвеститорите оваа седмица чекаат деловни резултати од неколку големи компании и економски показатели кои би можеле да укажат на тоа што може да направи Fed со каматните стапки“, вели Ламар Вилере, портфолио менаџер во компанијата „Villere & Co“.
Во претходните пет месеци, најголемата светска берза силно порасна бидејќи инвеститорите очекуваа американската централна банка (Federal Reserve – Fed) агресивно да ги намали каматните стапки оваа година, почнувајќи од јуни. Сепак, сѐ појасно е дека централната банка нема да брза со намалување на каматните стапки бидејќи пазарот на трудот е сè уште силен, економијата расте, а инфлацијата е сè уште покачена.
Затоа, на пазарот на пари сега се проценува дека има само 15 отсто шанси за намалување на каматите на Fed во јуни, а околу 42 отсто во јули.
Во тековната сезона на објавување квартални деловни извештаи, резултатите на повеќето компании не беа многу охрабрувачки. Оваа седмица, меѓу другите, технолошките гиганти како „Tesla“, „Meta Platforms“, „Alphabet“ и „Microsoft“ ќе ги објават деловните извештаи.
