Европските берзи пораснаа втор ден по ред во четвртокот наутро, бидејќи инвеститорите беа охрабрени од ублажувањето на инфлацијата во САД, што повторно ги поттикна шпекулациите за намалување на каматните стапки на американската централна банка.
Индексот STOXX 600 на водечките европски акции во првиот пресек од тргувањето порасна за 0,7 отсто, зајакнувајќи втор ден по ред. Лондонски FTSE индекс се зголеми за 0,65 отсто, на 8.355 поени, додека франкфуртски DAX порасна за 0,27 отсто, на 20.630 поени, а париски CAC за 1,39 отсто, на 7.576 поени.
Цените на акциите пораснаа и на азиските берзи. Азиско-пацифичкиот берзански индекс MSCI порасна за 0,8 отсто. Јапонскиот индекс Nikkei порасна за 0,3 отсто, додека цените на акциите во Шангај, Хонгконг, Јужна Кореја и Австралија пораснаа меѓу 0,3 и 1,4 отсто.
Така, берзите ја следат насоката на Волстрит, каде вчера индексите пораснаа со највисоки стапки за повеќе од два месеца. Dow Jones порасна за 1,65 отсто, додека S&P 500 скокна за 1,83 отсто, а Nasdaq индексот за 2,45 отсто, откако беше објавено дека потрошувачките цени во САД се зголемија за 0,4 отсто на месечна основа во декември, додека зајакнаа за 2,9 отсто во целата минатата година.
Ова е за 0,1 процентен поен помала инфлација од очекувањата на аналитичарите. Благодарение на ова, повторно зајакнаа шпекулациите за намалување на каматните стапки од страна на централната банка на САД.
Пазарот проценува дека Fed би можел да ги намали каматните стапки на состанокот во јуни. Дотогаш, велат аналитичарите, лидерите на централните банки ќе го следат влијанието на политиката на Доналд Трамп, кој ќе ја преземе функцијата следната недела, врз економијата и инфлацијата.
