Цените на акциите пораснаа на европските берзи во петокот претпладнето, по вчерашниот раст на берзанските индекси на Волстрит, а инвеститорите се фокусираат на кварталните деловни резултати на компаниите.
Индексот STOXX 600 на водечките европски акции во претпладневниот пресек порасна за 0,6 отсто, надополнувајќи ги вчерашните загуби. Истовремено, лондонскиот FTSE индекс зајакна за 0,45 отсто, на 7.656 поени, додека франкфуртски DAX се зголеми за 0,68 отсто, на 16.975 поени, а париски CAC за 0,36 отсто, на 7.616 поени.
Цените на акциите пораснаа и на повеќето азиски берзи. Индексот на MSCI на азиско-пацифичките акции, без јапонските акции, порасна за 1,2 отсто во истиот период како тргувањето во Европа, така што е на пат за седмична добивка од околу 0,7 отсто. Претпладнево на токиската берза индексот Nikkei порасна за 0,4 отсто, додека цените на акциите во Австралија и Јужна Кореја пораснаа меѓу 1,5 и 2,9 отсто. Во Хонгконг и Шангај, пак, тие паднаа меѓу 0,4 и 1,4 отсто.
Падот на цените на акциите во Хонгконг и Шангај е последица на лошото расположение на инвеститорите поради бавниот раст на кинеската економија и стравувањата од продлабочување на кризата на пазарот на недвижности и покрај бројните стимулативни мерки.
Подобро расположение има на другите азиски берзи, што најмногу се должи на вчерашниот раст на Волстрит. Така, индексите го следат растот на Волстрит, каде вчера Dow Jones зајакна 0,97 отсто, додека S&P 500 порасна 1,25 отсто, а Nasdaq индексот 1,30 отсто.
Инвеститорите се фокусирани на кварталните деловни резултати на компаниите. Досега 208 компании од индексот S&P 500 ги објавија своите деловни резултати од своето работење во последниот квартал од минатата година, при што околу 80 отсто од нив ги надминале очекувањата на аналитичарите во однос на заработката. Заработката во последниот квартал од минатата година сега се очекува да биде за 6,4 отсто поголема од пред една година, додека пред еден месец се проценува дека заработката ќе порасне за 4,7 отсто.
По затворањето на Волстрит, деловните резултати синоќа ги објавија технолошките гиганти „Apple“, „Amazon.com“ и „Meta Platforms“. Благодарение на подобрите од очекуваните резултати, цените на акциите на „Meta“ и „Amazon“ силно пораснаа, додека цената на „Apple“ значително падна.
Благодарение на ова, американските терминските S&P 500 и Nasdaq индекси моментално се во минус, што значи дека во петок попладнето цените на акциите на Волстрит би можеле да пораснат.
Во петок ќе биде објавен и извештајот за работни места во САД, кој обично има значително влијание врз насоката на пазарот. Сите најнови податоци покажуваат дека растот на американската економија и на пазарот на труд постепено забавува.
