На европските берзи во четвртокот претпладнето се тргуваше внимателно, а берзанските индекси стагнираат по трите дена силен раст.
Индексот на водечките европски акции STOXX 600 беше во минус од 0,2 отсто во 9,30 часот, откако во претходните три дена порасна за 2,5 отсто, а вчера достигна највисоко ниво за еден месец. Лондонскиот FTSE индекс претпладнево ослабе за 0,06 отсто, на 7.485 поени, а париски CAC за 0,15 отсто, на 7.199 поени. Франкфуртски DAX зајакна, пак, за 0,45 отсто, на 15.815 поени.
Внимателно се тргува и на азиските берзи. Индексот MSCI на азиско-пацифичките акции, без јапонските, беше во минус од 0,4 отсто околу 9,30 часот по средноевропско време, додека од почетокот на месецот порасна за околу 7 отсто. Претпладнево јапонскиот индекс Nikkei падна за 0,3 отсто, додека цените на акциите во Шангај, Австралија и Хонгконг паднаа меѓу 0,7 и 1,3 отсто. Во Јужна Кореја, сепак, тие благо се зголемија.
По вчерашниот силен раст на овие индекси, на азиските берзи претпладнево се тргува внимателно, додека инвеститорите ги следат вестите од средбата на американскиот и кинескиот претседател Џо Бајден и Кси Џинпинг.
Пазарите се поддржани од вчерашниот благ раст на Волстрит. Dow Jones зајакна за 0,47 отсто, додека S&P 500 порасна за 0,16 отсто, а Nasdaq индексот за 0,07 отсто.
Откако еден ден претходно податоците за потрошувачките цени покажаа дека инфлациските притисоци во САД се намалуваат, вчерашниот извештај за цените на производителите го потврди ова.
Имено, овие цени во октомври паднаа за 0,5 отсто на месечно ниво, најмногу во последните три ипол години. На годишно ниво, пак, тие пораснаа за 1,3 отсто, значително побавно од септември кога пораснаа за 2,2 отсто. Дополнително, вчера беше објавено дека продажбата на мало паднала за 0,1 отсто во октомври, помалку од очекувањата на аналитичарите.
„Овие нови податоци ги потврдија индициите од претходниот ден дека Fed се чини дека успеал да постигне „меко приземјување“ на економијата“, рече Роналд Темпл, стратег во компанијата „Lazard“.
Ублажувањето на инфлацијата ја поддржува тезата дека Fed нема да има потреба дополнително да ја заостри монетарната политика, односно дека циклусот на зголемување на каматните стапки е завршен и дека економијата ја избегна рецесијата.
Во наредниот период, движењата на пазарот ќе зависат главно од шпекулациите за тоа кога американската централна банка би можела да започне со намалување на каматните стапки. По новите податоци за инфлацијата, се интензивираа шпекулациите дека првото намалување на каматните стапки на Fed би можело да следи во мај следната година.
