На европските берзи во петокот претпладнето берзанските индекси благо паднаа, втор ден по ред, откако кон средината на седмицата достигнаа рекордни нивоа.
Индексот STOXX 600 на водечките европски акции беше во минус од 0,1 отсто. Истовремено, лондонскиот FTSE индекс ослабе за 0,03 отсто, на 8.435 поени, додека франкфуртски DAX се лизна за 0,25 отсто, на 18.690 поени, а париски CAC 0,12 отсто, на 8.178 поени.
Истовремено и на повеќето азиски берзи цените на акциите паднаа. Индексот MSCI на азиско-пацифичките акции, без јапонските, беше намален за 0,2 отсто, откако вчера го достигна највисокото ниво во последните 15 месеци. Утрово јапонскиот индекс Nikkei падна за 0,3 отсто, додека цените на акциите во Австралија и Јужна Кореја паднаа меѓу 0,8 и 1 отсто. Во Хонгконг и Шангај се зголемија за околу 1 процент.
Кинеските берзи се поддржани од владините најави за нови мерки за борба против кризата на пазарот на недвижности и надежите на инвеститорите за нови стимулативни мерки, со оглед на слабоста на економијата.
Утринава беше објавено дека трошоците на мало во Кина се зголемиле за само 2,3 отсто на годишно ниво во април, додека аналитичарите очекуваа зголемување од 3,8 отсто. Ова е значително побавен раст на потрошувачката од еден месец претходно, што укажува на слабост на домашната побарувачка.
На другите берзи во регионот цените на акциите благо паднаа, како и вчера на Волстрит, кога Dow Jones ослабе за 0,10 отсто, S&P 500 за околу 0,2, а индексот Nasdaq за речиси 0,3 отсто.
