Опозициската СДСМ, која до скоро ја водеше државата, денеска организира протест на наставниците пред Министерството за образование и наука, за „повисоки плати“. Оваа парадоксална политичка манипулација е повеќе од провидна, бидејќи, токму претходната власт која имала можност да придонесе за подобри плати наставниците, всушност, не предвидела никакви средства за тоа во буџетот за 2024 година.
Протестот, кој почна во 11.30 часот, може да се нарече фијаско, бидејќи и покрај партискиот повик, пред МОН може да се забележат многу малку демонстранти.
Од Самостојниот синдикат за образование и наука вчера се оградија од протестот со образложение дека нивни членови нема да учествуваат во политички протести. Со став излезе и министерката за образование и наука Весна Јаневска, според која партијата што го организира протестот имала можност во изминатиот период да го подобри статусот на наставниците.
Јаневска посочи дека со ребалансот на Буџетот се обезбедени 900 милиони денари за плати за наставниците, а се прават напори во ноември или декември наставниците да добијат и регрес за годишен одмор.