Нема ниту обид за провизии, ниту обид нешто да биде нелегално направено. Нема таква исплата од 12 милиони евра, тоа го проверува и ДКСК, рече министерот за здравство Венко Филипче во одговорот на прашањето поставено на денешната седница за пратенички прашања од пратеникот од ВМРО-ДПМНЕ, Петар Ристески, во однос на набавката на вакцини од Кина.
Тој појасни дека процесот на набавка на вакцини бил комплексен за сите земји во светот, не само за нашата и сите имале слични карактеристики, сите компании, производители, сите меѓународни системи и меѓународни институции, а тоа, подвлече Филипче, беше дека прво одеа според големината на пазарот и поантаму го запазуваа, по нивно инсистирање принципот на доверливост, нешто што не е невообичаено и во други делови, не само во здравството. Фармацевстките компании го задржаа ова право да ги имплементираат во сите земји во светот.
– Процесот на вакцинација одлично се спроведува во земјава, близу 55.000 граѓани денеска веќе се вакцинирани. Функционира КОВАКС системот од кој сите ние многу повеќе очекувавме, за жал почна нешто покасно и сега се става во функција во сите земји во светот согласно правилната распределба согласно динамиката што е веќе соопштена. Во таа смисла во нашата земја во моментот има вакцини од производителот Астра Зенека, од Фајзер, Спутник и кинески вакцини дел од донација, а дел се очекуваат в петок наутро од 200.000 вакцини – изјави Филипче.
Министерот повтори дека кога се обидувале да ги контактираат компаниите, многу од нив не одговарале, а на 30 декември кога од Фајзер соопштиле дека ќе дозволат да се направи договор, требало три месеци договорот да се финализира на нивно барање. Филипче подвлече дека такви биле постапките, процедурите и правилата што важат насекаде во светот. Тој информира дека многу компании им кажале дека не се согласуваат да дадат вакцини за големина на пазар како нашиот.
– Кинеските компании во еден момент не одговараа на повиците, затоа најдовме фирми што нè донесоа до производителите и воопшто не се фантомски. Нема таква исплата од 12 милиони евра, тоа го проверува и ДКСК, ние сме отворени и транспарентни во таа соработка и немаме што да скриеме. За сите вакцини од сите производители, сите одлуки за доверливост на затворена седница ги носеше Владата, на барање на компаниите на производителите кои не скаа да ги откријат цените. Тоа е политика на тие компании – рече Филипче, додавајќи оти нема ниту обид за провизии, ниту обид нешто да биде нелегално направено и за никакви разлики.
