Министерот за здравство Венко Филипче најави зголемување за 5 отсто на платите за сите вработени во јавно-здравствените установи. Во денешното гостување во емисијата „Утрински брифинг“, Филипче истакна дека зголемувањето на платите ќе биде и за медицинскиот, но и за немедицинскиот персонал вработен во здравствените установи.
– Тоа што денес треба да го утврдиме со Синдикатот е зголемувањето на платите за 5 отсто на сите коишто се вработени во здравствениот сектор. Покачување на платите ќе има и за здравствени работници, и нездравствени работници и тоа треба да започне од месец март. Покачувањето е од овој месец, односно на мартовската плата којашто се исплаќа во месец април – изјави Филипче.
Тој додаде дека Министерството за здравство во континуитет инвестира во човечки ресурси, освен зголемување на платите на здравствените работници и останатите вработени во јавно здравствените установи, во услови на ковид пандемија се реализираа 446 нови вработувања во јавното здравство.
– Со новите вработувања и зголемувањата на платите, Министерството за здравство создава услови секој млад здравствен работник својата иднина и кариера да ја гледа во својата земја – рече министерот.
