Вулкан во близина на главниот град на Исланд доцна ноќта во средата еруптираше по десетти пат во последните три години, исфрлајќи големи количества лава и чад, објави државната метеоролошка служба.
Додека магмата се акумулирала под земја, властите предупредувале на неизбежна вулканска активност на полуостровот Рејкјанес, околу 30 километри југозападно од главниот град Рејкјавик, каде што последната ерупција заврши на 6-ти септември.
Заспани 800 години, геолошките системи во областа беа повторно активирани во 2021 година и оттогаш еруптираа сѐ почесто, а последната е шеста досега во 2024 година.
Блискиот рибарски град Гриндавик, со речиси 4.000 жители пред наредбата за евакуација минатиот декември, останува главно напуштен поради повремената закана од текови на лава. Исландските власти подигнаа бариери за да ги пренасочат тековите на стопените карпи подалеку од градот, како и од инфраструктурата, како што се блиската електрана и Сината лагуна, лекувалиште со хотели и големи природни базени.
Научниците предупредија дека Рејкјанес веројатно ќе доживее повторени вулкански експлозии со децении, можеби дури и со векови.
Сепак, ерупциите не се очекува да предизвикаат нарушување какво што беше забележано кога вулканот Ејафјалајокул еруптираше во 2010 година, ширејќи облаци од пепел низ Европа и приземјувајќи околу 100.000 летови ширум светот.
Исланд, со население од речиси 400.000, се наоѓа на границата меѓу евроазиските и северноамериканските тектонски плочи, што го прави сеизмичко жариште со гејзери, извори на топла вода и десетици вулкани.
