Премиерот Никола Груевски денеска ги посети дечињата од СОС Детско село, им подели новогодишни пакетчиња и им посака убави желби за празниците кои претстојат.
Тој им порача дека не се сами, заборавени или оставени, туку дека државата е тука, мисли на нив и им помага колку што е тоа во нејзини можности.
Дечињата подготвија посебна претстава и кореографија со која ги пречекаа гостите.
Од домот СОС Детско село им доделија на Груевски и Диме Спасов благодарници за целата помош која им ја даваат на дечињата.
Премиерот посети и едно од семејствата кое згрижува дечиња.
Националниот директор на СОС Детското село Јулијана Накова Гапо се заблагодари за поддршката што децата ја добиваат од Владата во изминатите години, посочувајќи дека државата одвојува средства за сите 90 деца кои престојуваат таму.
– Голема благодарност за тоа. Во нашата работа може да се направи многу, но сам никогаш не можеш да направиш толку колку што е потребно. Ова партнерство и оваа поддршка освен што значеше многу за овие деца и нашата организација, значеше многу и за нашите партнери, посебно за странските донатори којшто од кога видоа дека СОС Детско село е еден сериозен партнер во државата и ја препознава нашата работа, ни беше дадена доверба да реализираме неколку сериозни социјални проекти, рече Накова Гапо. СОС Детското село врши обуки за згрижувачки семејства.
Исто така СОС Детското село реализира активности за поддршка на кризата со бегалците и тоа, како што кажа Накова Гапо, поставен е објект од 150 квадрати во Табановце.
– На дневно ниво на 50 до 200 деца им го олеснуваме процесот на престој или на транзиција во нашата земја, рече Накова Гапо.
Еден од штитениците на СОС Детско село сега е на студии на престижниот колеџ Мекалистер во Минесота во САД, што според неа, го потврдува квалитетот на нивната работа.