Противпожарно возило се превртелo на улица во скопско Маџари. На фотографијата се гледа превртеното возило камион и како од него истекува течност од цистерната, пренесува „Телма“.
Командантот на противпожарната бригада Ѕвонко Томевски ни изјави дека тројцата пожарникари во возилото се повредени и префрлени во Ургентниот центар каде им се утврдени телесни повреди. Еден пожарникар имал повреда на главата, а останатите двајца имале полесни повреди. Томевски вели дека причината за несреќата ќе се знае по полицискиот увид.
Инцидентот се случил околу 8.55, а фотографијата е снимена околу пладне. Цело време, повеќе од 3 часа сообраќајот на улицата Благоја Стефковски кај населбата Триангала беше во прекин поради увидот.
Пожарникарите се упатиле на интервенција да гаснат пожар. Полицијата во текот на денот ќе соопшти повеќе детали за незгодата.