Кристијано Роналдо не одигра ниту една минута на натпреварот по кој Јувентус обезбеди пласман во Лигата на шампионите, одлука која Андреа Пирло ја објасни на наједонставен начин, потенцирајќи дека Португалецот бил навистина изморен откако на средина на неделата играше Куп финале против Аталанта.
Јуве на крајот доби услуга од Верона која одигра 1:1 против Наполи и следната сезона ќе го гледаме во најелитното натпреварување, па во моменти кога се зборува за негово заминување од Торино, Кристијано направи резиме кое многумина го протолкуваа и како проштална порака.
– Животот и кариерата на секој врвен играч се составени од подеми и падови. Година по година, се соочуваме со фантастични тимови, извонредни фудбалери со амбициозни цели, поради што постојано мора да го даваме најдоброто од себе. Оваа година не ја освоивме Серија А, честитки до Интер за заслужено освоениот трофеј. Како и да е, мора да се вреднува што направивме со Јувентус оваа сезона, на колективно и индивидуално ниво.
– Го освоивме Суперкупот, италијанскиот Куп и бев најдобар стрелец во Серија А. Сето ова ме исполнува со среќа, особено во земја во која ништо не е лесно за освојување. Со овие достигнувања, остварив цел која си ја поставив уште првиот ден кога пристигнав во Италија: Го освоив Скудетото, Купот, Суперкупот, а исто така и бев најдобар голгетер во оваа убава земја исполнета со извонредни играчи, гигантски клубови и посебна култура, – вели Роналдо во делот од статусот кој многумина го толкуваат како негово збогување од Италија.
– Јас не бркам рекорди, рекордите ме бркаат мене. Фудбалот е колективен спорт, но индивидуалците се тука да помогнат за тимот да ги оствари своите цели. Секогаш барам повеќе на теренот, работам повеќе и така колективните титули се неизбежни. Многу сум горд на тоа што се пишува во последните денови: Шампион на Англија, Шпанија и Италија; Куп победник во Англија, Шпанија и Италија; Супекуп победник во Англија, Шпанија и Италија; Најдобар играч во Англија, Шпанија и Италија; Преку 100 гола за клуб во Англија, Шпанија и Италија. Ништо не се споредува со тоа дека оставив белег во овие земји и тоа што им донесов радост на фановите кои ги претставував. Ова ме носи напред и секогаш ќе одам напред до последниот ден. Благодарност до сите кои беа дел од овој пат! Остануваме заедно!, – вели Кристијано.
