Последната вулканска ерупција на Исланд покажа знаци на намалување на интензитетот во петокот, но ги оштети патиштата и цевководите и го прекина доводот на топлата вода во делови од полуостровот Рејкјанес каде се бележат температури доста под нулата.
Новата ерупција на вулкан во југозападен Исланд започна во четвртокот, третпат од декември, исфрлајќи лава до 80 метри во височина и нарушувајќи го секојдневниот живот на полуостровот Рејкјанес, јужно од главниот град Рејкјавик.
Како резултат на ерупцијата, на земјата се отворила пукнатина долга три километра. Во петокот наутро имаше само неколку отвори од кои избива стопените вулкански карпи.
Училиштата, детските градинки, музеите и другите јавни институции во областа останаа затворени во петокот, бидејќи лавата ги оштети цевките за термална вода во областа јужно од главниот град и го прекина снабдувањето со топла вода за 20.000 луѓе. Може да минат денови за повторно да се воспостави снабдувањето со топла вода преку помошниот цевковод.
„Многу е лошо што оваа област остана без топла вода, се надеваме дека ќе стигне до пладне. Но, имаме струја и вода за пиење“, рече премиерката Катрин Јакобсдотир. Температурата денеска е минус 8 Целзиусови степени.
Сателитските снимки објавени од Исландскиот метеоролошки институт покажуваат дека лавата се излеала на околу 4,5 километри западно од ерупцијата, на само 500 метри до познатата геотермална бања Сина лагуна.
На одредена локација помеѓу евроазиските и северноамериканските тектонски плочи, двете најголеми на планетата, Исланд е сеизмичко и вулканско жариште на активност, бидејќи под неговата површина двете плочи се движат во спротивни насоки. Само полуостровот Рејкјанес има шест активни вулкански системи, а ерупциите можат да бидат активни од време на време со децении, можеби дури и со векови. Целиот Исланд има над 30 активни вулкани.
