Невремето и обилните врнежи и понатаму прават проблеми низ Обединетото Кралство. Реката Темза синоќа се излеа и поплави неколку градови во јужна Англија, по што на неколку места го надмина рекордот во водостојот.
Најризично е во Беркшир, Суреј и Сомерсет, а поплавите се приближуваат кон Лондон. Но, бидејќи британската престолнина е заштитена со брана, нема опасност за поплави во градот.
Според британските медиуми 900 куќи се поплавени, а илјадници се уништени од надојдената вода.
Агенцијата за заштита на животната средина вчера издаде 14 предупредувања поради големите поплави долж Темза, што значи дека „опасни за живот“ се неколку области долж речното крајбрежје. Во поплавените краишта покрај Темза населението и војската со насипи од вреќи со песок се обидувааt да го ограничат прелевањето.
По поплавите следеа низа критики упатени до премиерот Дејвид Камерон дека не презел доволно мерки за спречување на поплавите.
Метеоролозите најавуваат опасност и во следните денови бидејќи ќе продолжат врнежите.
