Човекот осомничен за убиството на извршниот директор на „UnitedHealthcare“ во центарот на Менхетен и натаму е на слобода, а потрагата по него продолжи во четвртокот наутро.
Брајан Томпсон, кој беше прогласен за мртов во блиската болница, беше застрелан од маскиран вооружен маж пред хотелот „Hilton“ во центарот на Менхетен во средата наутро.
Весникот The Newe York Times (NYT) објави дека полицијата распоредила значителни полициски сили, подигнала дронови и повикала полициски сили со кучиња трагачи во потрагата по убиецот.
Од април 2021 година, Томпсон ја води „UnitedHealthcare“, американската подружница за здравствено осигурување на меѓународната осигурителна компанија „UnitedHealth Group“. „UnitedHealth“ е најголемиот здравствен осигурител во САД и опслужува десетици милиони Американци.
NYT објави дека убиецот користел пиштол со придушувач. Мотивот за нападот сѐ уште не е познат, но весникот наведува дека Томпсон неодамна добил закани.
Се нуди награда од 10.000 долари за информација што ќе доведе до апсење на убиецот.
Полицијата побарала снимка од камерите на местото на злосторството во обид да го утврди идентитетот на напаѓачот. Властите, исто така, се надеваат на информации од компанија за изнајмување велосипеди, откако камерите го фатиле бегалецот како вози велосипед во њујоршки Централ парк.
Градоначалникот Ерик Адамс рече дека се чини дека тоа не е случајно злосторство. Њујоршката полиција ја нарече неговата смрт „дрзок напад со предумисла“.
„UnitedHealth Group“ беше домаќин на планираниот настан за инвеститори во хотелот „Hilton“ во средата, а потоа извршниот директор Ендрју Вити излезе на сцената еден час откако започна и го откажа остатокот од програмата.
