Како еден од најбогатите луѓе на планетата, Роман Абрамович е најпознат како сопственик на фудбалскиот клуб „Челси”, како и на џиновски супер јахти. Рускиот богаташ исто така поседува импресивна колекција на скапи автомобили, кои неодамна ги возел на патеката Нирбургринг.
Колекцијата на супер автомобили на Абрамович чини околу 11 милиони евра, а во неа се наоѓаат „пагани зонда Р”, „бугати вејрон”, „астон мартин вулкан”, како и многу „ферарија”, „поршеа” и „мерцедеси”.
Сопственикот на познатата патека „Нирбургринг” е деловниот партнер на Абрамович и руски олигарх Виктор Каритонин, кој го поканил на гости малку да ги повози неговите „ѕверки”.
Меѓу автомобилите кои ги префрлил во Германија е и „пагани зонда Р”, произведени само 15 такви модели, а цената им е речиси три милиони евра.
Една од атракциите на патеката бил и прототипот на „ферари” моделот „FXX”.
„Господин Абрамович организираше и ексклузивен настан за себе и своите пријатели, а никој освен нив и персоналот немаше пристап на патеката” – рече Татјана Головлово, инструкторка на патеката.
Според пишувањето на медиумите, Абрамович, за кој се проценува дека е богат 11 милијарди долари, поминал возејќи на „нордшифле”, најдолгата делница со околу 20 километри патека.
