Групата Г7 од седумте индустријски најразвиени земји, чиишто претставници ќе се сретнат во Италија следната седмица, ќе разговара за ризикот од фрагментација на глобалната трговија откако САД наметнаа исклучително високи царини за производи од Кина, објави во вторникот италијанскиот министер за економија Џанкарло Џорџети.
Друга точка на дневниот ред на состанокот на министрите за финансии на Г7, што ќе се одржи на 24-ти и 25-ти мај во северниот италијански град Стреса, ќе биде како да се користат замрзнатите средства запленети од Русија по почетокот на војната во Украина, потврди Џорџети.
Американскиот предлог за користење на средствата за директно финансирање на војната во Украина ќе има „исклучително сериозни правни импликации“ кои сè уште треба да се разјаснат, рече Џорџети.
„Во Стреса ќе ја разгледаме фрагментацијата на глобалната трговија со најновите потези на американската влада, која ги покажа своите карти со многу строги мерки против Кина. На светот каков што го знаеме му се ближи крајот“, рече Џорџети додавајќи дека „во тек е трговска војна која ги одразува геополитичките тензии“ и дека Европа допрва треба да ја одреди својата улога во сценариото во развој.
Американскиот претседател Џо Бајден во вторникот објави за остро зголемување од дури 100 проценти на даниците за низа кинески увозни производи, вклучувајќи електрични возила, батерии за електрични возила, компјутерски чипови и медицински производи, во изборната година, чија цел е да ги придобие гласачите кои лошо ги оценуваат неговите економски мерки.
