Германските фудбалери ја совладаа репрезентацијата на Шкотска со 5:1 (3;0) во првиот натпревар на Европското првенство што се одигра во петокот вечерта во Минхен.
Стрелец на водечкиот гол за Германија беше Флоријан Вирц во 10. минута. Предноста на Германците ја удвои Џамал Мусиала во 19. минута, а за 3:0 стрелец беше Каи Хаверц од пенал во првата минута од судиското продолжение во првото полувреме. Никлас Фуелкруг погоди за 4-0 во 68. минута. Шкотите го намалија резултатот на 4:1 во 87. минута со автоголот на германскиот дефанзивец Антонио Рудигер, а потоа Емре Џан ги постигна конечните 5:1 во 93. минута и со тоа на Германија ѝ ја донесе најубедливата победа во настапите на европските првенства, а ова воедно беше и најголемата победа на една селекцијана отворањто на континенталниот шампионат.
Германија ги освои првите три бода и заседна на врвот на табелата во групата А. Вториот натпревар од 1. коло во оваа група се игра в сабота во Келн каде од 15 часот се среќаваат Унгарија и Швајцарија.
Германскиот селектор Јулијан Нагелсман против Шкотите на преполниот стадион во Минхен извади силен тим кој се искристализираше низ подготвителните настапи. Колку ќе бидат опасни Германците, покажаа веќе во 2. минута, кога Антонио Рудигер упати одлична топка кон Флоријан Виртц, кој ја прими топката зад високо поставената шкотска одбрана и изби сам пред шкотскиот голман Ангус Ган. Се обиде да го префрли, но го погоди со топката во главата. Сепак, и доколу Вирц ја погодеше мрежата, погодокот ќе беше поништен, бидејќи германскиот напаѓач се најде во офсајд позиција.
Шкотите тешко доаѓаа до посед и ретко успеваа да излезат од својата половина. Веќе во 10. минута шкотската одбрана капитулираше, а акцијата која заврши со првиот гол на овој турнир започна со долго додавање по дијагонала на Тони Крос. Со прецизна топка го префрли тежиштето на акцијата во нападот од левата на десната страна, каде ја прифати Џошуа Кимих. Фудбалерот на Баерн имаше доволно време мирно да ја прими топката, а можеше да види и каде се позиционирани неговите соиграчи. Го забележа Флоријан Вирц на работ од шеснаесетникот и му испрати приземна топка. Напаѓачот на новиот германски шампион Баер Леверкузен шутираше без двоумење со десната нога. Шкотскиот голман Ган се фрли и ја дофати топката со десната рака, но таа се одби од стативата и заврши во мрежата, предизвикувајќи еуфорија кај германските навивачи на трибините. Ова беше втор гол на Вирц за репрезентацијата, а прв во официјален меч од натпреварувачки карактер.
Девет минути подоцна Германците го удвоија водството. Целосно ја неутрализираа секоја закана од Шкотланѓаните кои ретко ја минуваа средината на теренот, а беа опасни и во напаѓачката третина. Во 19. минута по неколку прецизни додавања на средината од теренот по левата страна бешпе исфрлен Хаверц. За момент имаше отворен пат кон голот, но еден од шкотските дефанзивци успеа да го затвори. Сепак, Хаверц застана во шеснаесетникот, ја испрати топката кон средината каде што беше Џамал Мусиала кој од десетина метри неодбранливо ја испрати топката под гредата за 2:0.
Во 25. минута главниот судија Французинот Клемент Турпен досуди пенал за Германија поради прекршок над Мусиала. Сепак, прегледот во ВАР просторијата покажа дека почетниот прекршок бил надвор од шеснаесетникот.
Она што тогаш не го добија, благодарение на ВАР технологијата, домашните фудбалери го добија при крајот на првото полувреме. Во 42. минута, по ударот со глава на Гундоган кој Ган го одбрани, шкотскиот стопер Рајан Портеус се обиде да ја шутне топката пред капитенот на германската репрезентација, но покрај топката, тој ја зафати и потколеницата на Гундоган и со ѓонот од копачката. Турпен не се огласи, но по интервенција од ВАР-собата ја погледна снимката и без размислување досуди пенал и го исклучи Портеус поради опасен старт. Каи Хаверц беше прецизен од 11 метри, па Германците на полувремето веќе имаа три гола предност.
Селекторите направија по една замена на полувремето. Нагелсман го повлече Андрих кој беше оптоварен со жолт картон и го внесе Грос, а Стив Кларк го замени напаѓачот Адамс со стоперот Ханли за да ја пополни дупката во одбраната што ја остави исклучувањето на Портеус.
Иако германскиот притисок малку ослабна во вториот дел, сепак Шкотите не можеа да создадат сериозна офанзивна акција. Сите можности што ги имаа беа од прекини, но и тогаш не можеа да дојдат во позиција да упатат удар кон невработениот Мануел Нојер.
На почетокот на вториот дел Германците се обидоа да постигнат гол со удари и од далечина. Но оној на Рудигер во 51. минута беше сопрен од Ганс, а ударот на Вирц во 58. минута мина преку гредата. Напорите на Германците да постигнат уште еден гол ги материјализираше Никлас Фуелкруг во 68. минута, само пет минути откако го замени Хаверц. Топката малку среќно се одби до неговите нозе на работ од шеснаесетникот, но следеше одличен потег. Тој со левата нога ја турна топката надесно, а потоа со силен удар погоди во горниот лев агол од голот на Шкотска. Во 76. минута напаѓачот на Борусија Дортмунд уште еднаш ја испрати топката во мрежата, но неговиот гол беше поништен поради минималното задно поле.
Кога се чинеше дека 4:0 ќе биде конечниот резултат, топката заврши зад грбот на Нојер, со низа несмасни реакции на германските дефанзивци. По центаршут во шеснаесетникот, топката се одби од тројца германски фудбалери, а несреќниот Антонио Рудигер последен играше со неа и со глава ја испрати во мрежата на немоќниот Нојер.
На крајот, во третата минута од судиското продолжение Германците сепак дојдоа до четири гола предност, а во акцијата за петтиот гол учествуваа резетрвистите. Томас Милер го пронајде Емре Џан на работ од шеснаесетникот, а тој со прецизен удар ги постави конечните 5:1.
