Проценката на заканата од исламистичкиот тероризам за Германија останува висока, но таа не е променета по нападот во концертната сала во близина на Москва, соопшти во понеделникот агенцијата за државна безбедност.
Во исто време, германската влада во понеделникот објави дека Германија е добро подготвена за можни исламистички напади, што вклучува заштита за време на претстојното европско фудбалско првенство во Германија.
Но, Германија, како што беше најавено, нема намера да го подигне нивото на подготвеност во борбата против тероризмот како што тоа го направи Франција по терористичкиот напад во Москва, во кој загинаа 137 лица, за кој наводна одговорност презеде огранок на терористичката организација Исламска држава.
За германската министерка за внатрешни работи Ненси Фезер, од владејачката Социјалдемократска партија на Германија (SPD) голема опасност доаѓа од огранокот на Исламската држава за авганистанската провинција Коросан.
Германските безбедносни сили ја гледаат групата, која е активна главно во Авганистан, како голема закана за земјата и за Европа во целина.
„Безбедносните мерки се веќе засилени, а безбедносните концепти за заштита на местата на Европското фудбалско првенство се подобруваат секој ден“, изјави портпаролот на Министерството за внатрешни работи во Берлин.
За време на првенството, меѓу другото, се подготвува и засилена гранична контрола.
Експертот за тероризам Питер Нојман изјави за германскиот јавен радиодифузер Deutschlandfunk дека Германија и Европа се соочуваат со зголемена закана од терористички напади со исламистичка позадина од почетокот на војната во Газа.
„Само во последните неколку месеци беа спречени неколку напади“, рече Науман, посочувајќи на апсењата поврзани со наводно планираните напади во Данска и Германија, вклучувајќи ја и катедралата во Келн.
„Имаше осум обиди за џихадистички терористички напади во Европа од почетокот на војната во Газа, во споредба со само шест такви обиди во цела 2022 година“, вели Нојман цитирајќи податоци од агенцијата за спроведување на законот на Европската унија – Europol.
