Патниците во Германија се соочуваат со откажување на возовите низ целата земја од средата, бидејќи тридневниот национален штрајк на железницата го зголемува хаосот во патувањето во најголемата европска економија, каде што тековните протести на земјоделците, исто така, го попречуваат патниот сообраќај.
Синдикатот на машиновозачите GDL го започна штрајкот во раните утрински часови во средата, по штрајкот на машиновозачите кои престанаа со работа во вторникот вечерта. Штрајковите ќе продолжат до петок навечер, принудувајќи го националниот железнички оператор „Deutsche Bahn“ да користи само скратен возен ред за итни случаи.
Компанијата соопшти дека штрајкот ќе влијае врз плановите за патување на милиони луѓе и ги повика граѓаните да ги откажат или одложат сите несуштински патувања.
По „божикното примирје“ повторно се разгоре долгогодишниот спор за платите и работното време. Синдикатот GDL бара намалување на работното време од 38 на 35 часа седмично за работниците во смени, како и зголемување на платите за 555 евра месечно и еднократен надомест за инфлацијата од 3.000 евра.
Од операторот „Deutsche Bahn“, пак, понудија флексибилност во работното време, но одбија да ги скратат без намалување на платата.
Штрајковите на националните железници доаѓаат во време на растечката економска главоболка со која Германија се соочува и оваа година, поттикнати од лошите макроекономски податоци, високите каматни стапки и растечката критика за коалициската влада.
Протестите на фармерите оваа седмица, предизвикани од планираните кратења на субвенциите, извршија дополнителен притисок врз канцеларот Олаф Шолц, чијашто влада се обидува да донесе буџет за 2024 година. Шефот на германското здружение на земјоделци DBV вети дека ќе ги засили протестите во средата, откако конвоите трактори и камиони ги блокираа патиштата претходно оваа седмица ширум земјата.
