Гитарите и други предмети од колекцијата на англискиот музичар Џеф Бек се продадени на наддавање за вкупно 8,73 милиони фунти (10,3 милиони евра).
Повеќе од 130 гитари, заедно со засилувачи и педали од речиси шестдецениската кариера на гитаристот, беа понудени на наддавање во четвртокот, а два од неговите инструменти беа продадени за повеќе од милион фунти секој.
Гитарата „Oxblood Gibson Les Paul“ од 1954 година, за која се проценуваше дека ќе достигне цена од 500.000 фунти, продадена е за 1,06 милиони фунти.
Главниот инструмент за изведување и снимање на Бек од 1999 до 2014 година, „Fender Stratocaster“ познат како „Анушка“, исто така беше продаден за милион фунти, откако првично беше проценет на 20.000 до 30.000 фунти.
Аукциската куќа Christie’s соопшти дека гитарата била „често користена и тешко оштетена за време на турнејата на Бек со Карлос Сантана“, што довело до мала пукнатина во вратот од неколку инчи и барала поправка.
Бек почина на 78-годишна возраст во јануари 2023 година, по кариерата во која освои осум Греми награди и работеше со многу познати имиња, вклучувајќи ги Ози Озборн и Мик Џегер.
