Грција планира да формира државен фонд за стабилизација кој ќе ги инвестира приходите од продажбата на државните средства во инфраструктурни и зелени проекти, изјави министерот за финансии Костис Хацидакис.
Фондот ќе ги инвестира средствата од продажбата на имотот што остана во државна сопственост по грчката должничка криза, вклучувајќи недвижен имот, пристаништа и комунални услуги, објасни министерот на прес-конференција, презентирајќи го планот на владата.
Според него, почетниот капитал на фондот ќе изнесува 300 милиони евра, а приходите од продажбата на средствата ќе се инвестираат во финансирање зелени проекти, инфраструктура и нова технологија.
„Го ангажиравме ‘BlackRock’ да ја предложи најдобрата корпоративна структура за фондот“, рече Хацидакис споменувајќо го американскиот фонд, најголем во светот во сегментот на управување со средства.
Грчката агенција за приватизација HRADF и фондот за спас на банките HFSF ќе се спојат во државната холдинг компанија „Hellenic Corporation Assets and Participations“ (HCAP), која е основана во 2016 година и управува со подружници на државните комунални претпријатија и акционерски удели во компании.
Агенцијата и двата фонда имаат стекнато вкупно 10 милијарди евра преку продажба на средства и акции во банките досега за потребите на намалување на грчкиот долг за време на кризата од 2010 до 2018 година, рече министерот.
Фондот за спас на банките неодамна целосно приватизираше три грчки кредитора, а до крајот на годината планира да ги продаде преостанатите 18 отсто од акциите во „National Bank“ и 72,5 отсто во банката „Attica“, додаде Хацидакис.
И Ирска на крајот од минатата година најави и формирање државен фонд за стабилизација со цел полесно да се покријат идните здравствени, пензиски и климатски трошоци и да се воспостави заштитен механизам од пад на капиталните инвестиции во случај на криза. Од сега до 2035 година владата во фондот ќе инвестира 0,8 отсто од номиналниот бруто домашен производс (БДП) или 4,3 милијарди евра годишно.
