Претседателот на Владата на Република Македонија, Никола Груевски и владината делегација, вчера остварија средба со македонската дијаспора во Њу Џерси, Соединетите Американски Држави.
Во своето обраќање премиерот Груевски ја истакна значајноста на македонската дијаспора во промоцијата на македонските интереси, истакнувајќи дека Владата и во идниот период ќе продолжи да ги остварува заложбите за унапредување на соработката со иселениците и ќе продолжи да спроведува проекти кои се од интерес за дијаспората. Ја истакна и значајноста на финансиските контрибуции кои македонските иселеници ги упатуваат на членовите на нивните семејствата кои живеат во нашата земја, и истакна дека иселениците се значаен сегмент од македонската нација кои служат како мостови за соработка во земјите во кои живеат.
Премиерот Груевски истакна дека Владата го втемели правото на глас на иселениците, и се заблагодари на претставниците на македонската дијапсора за промовирањето на Македонија.
Благодарен сум и за поддршката што секаде каде што можете, а тоа ми е потврдено од многу ситуации и информации, лобирате за Македонија, го ширите добриот глас за Македонија, и тоа многу значи. Не е единствено важно тоа некој да го направи во Обединетите Нации или во Белата Куќа или во некои центри, тое е секако многу важно, но многу е важно, исто така, и ширењето на добриот глас за Македонија насекаде, на секое место, и тој добар глас што се шири за Македонија да стекнува што е можно подобар имиџ, истакна премиерот Груевски во своето обраќање пред иселениците во Њу Џерси.
Дијаспората на ефикасен начин го добива потребните документи
Премиерот Груевски, пред присутните се осврна и на проектите кои се спроведуваат, а во чиј фокус се македонските иселеници, како што е проектот преку кој членовите на дијаспората на ефикасен начин може да ги добиваат потребните документи кои ги издаваат надлежните органи на Република Македонија. Претседателот на македонската Владата ги информираше присутните и за реформите кои се спроведуваат во нашата земја, и истакна посветеност за градење на понатамошни заеднички активности со дијаспората.
Благодарност од дијаспората за постојаната комуникација и проектите
Македонските иселеници позитивно ги доживуваат средбите со македонската Влада и од нивна страна активно работат на промоција на Македонија.
Драго ми е што Премиерот и другите претставници на нашата Влада дојдоа да не посетат тука. Ова не е прв пат, но не и последен, се надевам дека ќе бидат и почести ваквите посети, ќе не сплотат, значи нема да се чувствуваме сами тука, ќе знаеме дека нашата Влада мисли на нас затоа што и ние мислиме на Македонија, постојано и ја посетуваме Македонија. Ја промовираме, кај што ќе најдеме и јас и мојата фамилија ја промовираме нашата држава, и носиме и луѓе да ја посетат, покажуваме слики, настани, покажуваме и културни збиднувања што се случуваат во Македонија, изјави Никола Попоски, кој во Њу Џерси работи како професор во средно училиште.
Иселениците упатија благодарност до владината делегација за постојаната комуникација со иселениците и реализацијата на проекти кои се од интерес за дијаспората, истакнувајќи дека и во следниот период тие активно ќе дејствуваат со цел поддршка на политиките на Владата за привлекување на странски инвестиции.
Македонската заедница овде во регионот на Њу Џерси, Њујорк и Конектикат се труди максимално за остварување на контакти со бизнисмени кои што се дел од оваа заедница, да се овозможи тие се повеќе да инвестираат во Македонија и се повеќе да остваруваат бизнис контакти со претставниците на бизнис секторот во Македонија, изјави Горан Митевски, стопанственик од Њу Џерси.
