Програмата за условен паричен надомест ќе продолжи и оваа година. За таа цел обезбедени се 80 милиони денари кои ќе бидат наменети за околу 6.500 семеjства чии деца посетуваат средно образование. За ова информираше претседателот на ВМРО-ДПМНЕ Никола Груевски кој престојуваше во работна посета на општина Илинден.
Како што информира, оваа мерка била усвоена уште на првата владина седница што се одржа во јануари годинава, а е дел од програмата која што на сите приматели на социјална помош им овозможува доколку децата посетуваат средно образование на редовна основа да добијат поголема финансиска помош.
Тоа е мерка која што ја воведовме пред 6, 7 години и одлично се одвива, а ќе продолжи и оваа година. Со буџетот што се усвои минатата година и со програмата што се усвои во јануари се планираат 80 милиони денари за шест и пол илјади семејства, финансиска помош за поддршка на нивните деца во средно училиште, рече Груевски.
Досега преку оваа владина мерка доделени се вкупно 360 милиони денари.