Премиерот Никола Груевски денеска присуствува на Самитот за Западен Балкан во Виена што се оддржува под покровителство на австрискиот канцелар Вернер Фајман.
Покрај премиерот Никола Груевски, во владината делегација која денес присуствува на Самитот за Западен Балкан во Виена се и заменик претседателот на Владата Владимир Пешевски, министерот за надворешни работи Никола Попоски и министерот за економија Беким Незири.
Самитот се одржува во континуитет на „Берлинскиот процес“, инициран со Берлинската конференција за Западен Балкан, која се одржа под покровителство на германската канцеларка Ангела Меркел во август 2014 година.
На Виенската конференција, како што соопшти македонското МНР, покрај премиерите на земјите од Западен Балкан, учество ќе земат и германската канцеларка Ангела Меркел, италијанскиот премиер Матео Ренци, потпретседателот на Европската комисија Федерика Могерини, претседателот на Европската банка за обнова и развој Сума Чакрабарти, претседателот на Европската банка за инвестиции Вернер Хојер, потпретседателот на Светската банка Лора Тук, како и официјални претставници на Словенија, Хрватска и на Франција, која е следен домаќин на оваа конференција.
