Слушам дека СДСМ планирале разни игри за локалните избори, дека сакале со помош на полицијата и структурите кои им помогнаа на парламентарните избори, вклучувајќи и во албанските средини, повторно да прават исти нечесни трикови и операции, и во Скопје, и во неколку други општини. Сакам да им порачам да не си играат со трпението и волјата на народот и дека за тоа, ако се обидат, ќе ги стигне казната, и повторно ќе изгубат од ВМРО-ДПМНЕ како партија, односно ќе имаат далеку помал вкупен број гласови.
Ова го истакна претседателот на ВМРО-ДПМНЕ Никола Груевски, кој се обрати на 26-та Годишната конференција на УМС.
„Тоа ќе биде важно за да се влезе потоа во политички процес кој ќе води кон нови парламентарни избори, а по нашата победа на тие избори ние имаме план како да формираме влада, во која секако ќе бидат застапени и албанските граѓани преку нивни партии, и која заедно со сопствени сили и со подршка на партнерите од меѓународната заедница ќе ги решава проблемите на Македонија“, рече Груевски.
Додаде дека ВМРО-ДПМНЕ во изминатиот период е стигматизирано во повеќе погледи особено и во полето на надворешните односи, но она што партијата го прави е полемика, односно дебата на аргументи и прицнипи.
„Во наредниот период ќе поработиме на развој на односите и соработка со пријателите на Република Македонија, пред сѐ, поради интересите на Македонија, средувањето на односите со поедини западни пријатели и уривање на стереотипите кои Албанците ги имаат за нас дека ние им сакаме лошо. Тоа не е вистина. А многу брзо ќе се покаже дека сме говореле исправно“, посочи лидерот на ВМРО-ДПМНЕ.
