Палестинската милитантна група Хамас ја осуди одлуката на САД да стават вето на предложената резолуција во Советот за безбедност на Обединетите нации за итен прекин на огнот во Појасот Газа, велејќи дека израелската окупација има за цел „убивање и раселување“ на Палестинците.
Претседателот Џо Бајден и неговата администрација имаат директна одговорност за неусвојувањето на резолуцијата за прекин на огнот во Газа. Американската позиција се смета за зелено светло за окупаторот да изврши повеќе злосторства и да ги убива нашите невини луѓе преку бомбардирање и гладување, се вели во соопштението на Хамас.
Кабинетот на претседателот на Палестинската управа Махмуд Абас соопшти дека американското вето во Советот за безбедност на ОН и пркоси на меѓународната заедница и му дава на Израел „дополнително зелено светло за Израел да продолжи со својата окупација и својата агресија врз народот на Газа и да изврши крвав напад врз Рафах“.
Палестинското претседателство, исто така, соопшти дека ја смета американската администрација за одговорна за „поддршката и обезбедувањето заштита“ на израелските „варварски напади“ врз децата, жените и постарите лица во Газа.
„Оваа политика ги прави Соединетите држави партнер во злосторствата на геноцид и етничко чистење и воените злосторства извршени од израелските сили“, се вели во соопштението што го објави официјалната палестинска новинска агенција Wafa.
Соединетите држави денеска повторно ставија вето на предложената резолуција на Советот за безбедност на Обединетите нации за итен прекин на огнот во Појасот Газа, третпат од почетокот на војната на 7-ми октомври.
Од 15 членки на Советот за безбедност на ОН, 13 гласаа за резолуцијата предложена од Алжир, додека Велика Британија беше воздржана.
„Гласањето за нацрт-резолуцијата е глас за поддршка на правото на живот на Палестинците. Спротивно на тоа, гласот против е поддршка за бруталното насилство и колективната казна што им е нанесена, изјави алжирскиот амбасадор во ОН“, Амар Бенјама.
Американската амбасадорка во светската организација Линда Томас-Гринфилд денеска изјави дека секоја акција преземена од Советот за безбедност би значело мешање во „чувствителните, тековни преговори“.
„Сметаме дека резолуцијата ќе има негативно влијание врз преговорите. Барањето итен, безусловен прекин на огнот, без договор кој бара од Хамас да ги ослободи заложниците, нема да донесе одржлив мир и само ќе го продолжи конфликтот“, изјави Гринфилд.
Наместо тоа, САД предложија своја нацрт-резолуција со која се повикува на привремен прекин на непријателствата и се изразувајќи противење на плановите на американскиот сојузник Израел за копнена офанзива во Рафа. Вашингтон прецизираше дека нема да брза резолуцијата да ја предложи за гласање за да обезбеди време за преговори.
Резолуцијата предложена од Алжир, на која САД ставија вето, не го обврзува склучувањето на привремено примирје со ослободување на заложниците и содржи само повик за итен хуманитарен прекин на огнот и итно и безусловно ослободување на заложниците.
