Високи претставници на милитантното движење Хамас одржаа прес-конференција на непозната локација. Во име на Хамас зборуваше портпаролот Осама Хамдан, пренесува Скај њуз.
Тој прво се осврна на неодамнешните тврдења на портпаролот на израелските одбранбени сили (ИДФ), Даниел Хагари, кој рече дека Хамас складира оружје под болницата Шеик Хамад. Тој го негираше ова и рече дека Хамас не ги користел дупките за кои Израел тврди дека се влезови во подземен тунел.
Портпаролот на Хамас ги повика ОН да ги набљудуваат болниците во Газа за да ги видат воените злосторства на Израел и да утврдат дека Хамас нема никаква врска со тоа.
Хамдан потоа се сврте кон екранот на кој беше прикажана фотографија со наслов „Холокауст во Газа“, пред да каже дека Израел намерно гаѓал цивили во Газа, додавајќи дека во тој процес уништил околу 250.000 домови.
„Окупаторската армија цели кон… жени и деца на отворено, на улиците“, потенцираше тој.
Портпаролот тврди дека Израелците им делеле летоци на цивилите во Газа во кои ги повикуваат да се евакуираат за да ги натераат да ги напуштат своите домови и да станат полесни мети.
Портпаролот на Хамас, Осама Хамдан потоа ја коментираше пошироката, меѓународна слика.
– Ги предупредуваме сите страни, ако сакаат да му направат нешто на нашиот народ… нашиот голем палестински народ тоа нема да го прифати“, рече тој.
„САД имаат валкани планови“, оцени портпаролот, пред да додаде дека народот на Газа нема да молчи доколку Вашингтон продолжи со партнерството со окупаторите, мислејќи на Израел.
– Сакаме независна држава со Ерусалим како главен град, истакна Хамдан.
– Секој што мисли дека Хамас ќе биде уништен е во заблуда. Хамас ќе биде победник во војната со Израел, додаде портпаролот на Хамас, организација која е прогласена за терористичка во ЕУ, САД, Канада, Израел и Јапонија.
– Победивме на 7 октомври и ќе останеме победници, истакна тој. Остануваме цврсто и непријателот ќе претрпи загуби и упатуваме благодарност до нашиот народ и нашите маченици“, заклучи портпаролот на Хамас.
