Делегација на палестинската милитантна организација Хамас ќе отпатува во египетската престолнина Каиро во саботата, изјавил за Reuters функционер на движењето, додека се очекува неговиот одговор на предлогот на Израел за прекин на огнот во Појасот Газа и ослободување на заложниците.
Функционерот на Хамас, кој сакал да остане анонимен, разговарал со Reuters доцна во петокот откако шефот на американската Централна разузнавачка организација (CIA), Вилијам Барнс, пристигнал во Каиро поради состанокот за судирот во Газа, според египетски безбедносен извор и уште три извора од аеродромот во главниот град на Египет.
Египет повторно се обиде да ги заживее преговорите кон крајот на април. Каиро е вознемирен поради можната израелска копнена офанзива, како што тврди Израел против борците на Хамас, во градот Рафах на самиот југ на палестинската енклава непосредно до египетската граница.
Во овој тешко руиниран од израелските бомбардирање град, кој пред војната имаше околу 300.000 жители, во моментов се засолнети околу 1,5 луѓе, или повеќе од половината од 2,4-милионското население на Појасот Газа. Египет стравува дека целта на израелската офанзива на е да ги натера во бегство Палестинците на египетска територија, што во историјата веќе се има случувано а властите во Каиро не го посакуваат и поради тоа уште од избувнувањето на војната ја блокираа границата кон енклавата.
Одвоено од овие напори, Народниот фронт за ослободување на Палестина, чиишто вооружени фракции исто така учествуваат во борбите со израелската војска во Газа, ги повтори во петокот барањата на обединетите палестински фракции на отпорот кои вклучуваат трајно примирје, повлекување на израелските сили од Појасот Газа и враќање на сите раселени лица во нивните домови.
„Постои целосна и непрекината соработка меѓу сите фракции на отпорот и, исто така, постои консензус за овие барања“, истакна групацијата во соопштението испратено до медиумите.
Египетската телевизија Al-Qahera News, цитирајќи високо позициониран египетски извор, исто така, објави дека во саботата во Каиро ќе допатува делегација на Хамас на разговори за развојот на ситуацијата во преговорите за примирјето во Газа.
Посредниците во преговорите велат дека го очекуваат одговорот на Хамас на најновата верзија на предлогот за прекин на огнот и ослободување на израелските заложници во замена за ослободување на Палестинци кои е во израелските затвори.
